മുംബയ്: മഹാരാഷ്​ട്രയിൽ മുഖ്യമന്ത്രിയും ശിവസേന തലവനുമായ ഉദ്ധവ് താക്കറെയെ വിമർശിച്ചതിന് ബി.ജെ.പി നേതാവായ ശിരിഷ്​ കടേക്കറിനെ കരിഓയിലിൽ കുളിപ്പിച്ച് ശിവസേന പ്രവർത്തകരുടെ പ്രതിഷേധം. കൂടാതെ, പൊതുനിരത്തിലൂടെ നടത്തിയും സാരിയുടുപ്പിച്ചും ചെരുപ്പൂരിയടിച്ചും അപമാനിച്ചു. സോലാപുരിലാണ് സംഭവം. സംഭവത്തിൽ 17 പേരെ അറസ്റ്റ് ചെയ്തെന്ന് പൊലീസ് അറിയിച്ചു.

സംഭവത്തിന്റെ വീഡിയോ ദൃശ്യങ്ങൾ സമൂഹമാദ്ധ്യമങ്ങളിൽ വൈറലായിട്ടുണ്ട്​. ശിവസേന പ്രവർത്തകർ ശിരീഷിന്റെ തലവഴി കരിഓയിൽ ഒഴിക്കുന്നതും ഇയാളെ തെരുവിലൂടെ നടത്തിക്കുന്നതും പിന്നീട്​ നീല നിറത്തിലുള്ള സാരി ഉടുപ്പിക്കുന്നതും വീഡിയോയിലുണ്ട്. ഇടക്ക്​ ഒരാൾ ചെരുപ്പൂരി ശിരിഷിനെ അടിക്കുന്നുണ്ട്​. വീണ്ടും അടിക്കാൻ ശ്രമിക്കുന്ന ഇയാളെ മറ്റുള്ളവരും ഒരു പൊലീസ്​ ഉദ്യോഗസ്ഥനും ചേർന്ന്​ തടയുന്നതും കാണാം. ഉദ്ധവ് താക്കറെയെ വിമർശിച്ചതിനാണ് ശിരിഷിനെ കരിഓയിലിൽ കുളിപ്പിച്ചതെന്നും ഇതിന്റെ ഉത്തരവാദിത്വം ഏറ്റെടുക്കുന്നുവെന്നും ശിവസേന നേതാവ്​ പുരുഷോത്തം ബർഡെ മാദ്ധ്യമങ്ങളോട്​ പറഞ്ഞു.