തിരുവനന്തപുരം: ചോദ്യ പേപ്പർ വിവാദത്തെ തുടർന്ന് കെൽട്രോൺ എം ഡി ടി ആർ ഹേമലതയെ മാറ്റി. അക്ഷയ കേന്ദ്രങ്ങളുടെ ഫ്രാഞ്ചൈസികൾക്കായി കെൽട്രോൺ നടത്തിയ ഓൺലൈൻ പരീക്ഷയുടെ ചോദ്യം വിവാദമായതിനെ തുടർന്നാണ് ഹേമലതയെ എം ഡി സ്ഥാനത്തുനിന്ന് മാറ്റിയത്. കെൽട്രോൺ ചെയർമാൻ നാരായണമൂർത്തിക്കാണ് പുതിയ ചുമതല.
കൊല്ലം ജില്ലയിലെ അക്ഷയകേന്ദ്രങ്ങളിലെ പുതിയ ഫ്രാഞ്ചൈസികൾ ക്ഷണിച്ചു കൊണ്ട് കെൽട്രോൺ നടത്തിയ ഓൺലൈൻ പരീക്ഷയിലെ ചോദ്യമാണ് വിവാദമായത്. യേശുക്രിസ്‌തുവിന്റെ വരവിന് ശേഷം പ്രാധാന്യം നഷ്‌ടപ്പെട്ട ഹിന്ദു ദൈവം ഏത് എന്നായിരുന്നു ചോദ്യം. ഈ ചോദ്യം വിവാദമായതിന് പിന്നാലെ ഏഷ്യൻ ഹിസ്റ്ററിയിലെ വേദിക് വിഭാഗത്തിലെ ചോദ്യമായിരുന്നു ഇതെന്ന വാദവുമായി കെൽട്രോൺ രംഗത്തെത്തുകയായിരുന്നു.
ഒരു മതവിഭാഗത്തിന്റെ വിശ്വാസത്തെ വ്രണപ്പെടുത്തുന്നതാണ് ചോദ്യമെന്നായിരുന്നു പ്രധാന വിമർശനം. ചോദ്യം തയ്യാറാക്കാൻ ഏൽപ്പിച്ചിരുന്ന വിഭാഗത്തിലെ ചില ഉദ്യോഗസ്ഥർ വിഭാഗീയത സൃഷ്‌ടിക്കാൻ ശ്രമിച്ചതിന്റെ ഭാഗമായാണ് ചോദ്യം ഉൾപ്പെടുത്തിയതെന്നും ആരോപണം ഉയർന്നു. ഈ പശ്ചാത്തലത്തിലാണ് കെൽട്രോൺ എം ഡിയെ മാറ്റിയത്.