മുംബയ്: തന്നേക്കാൾ ബുദ്ധിയും അഭിനയശേഷിയും ഉള്ള നടിമാർ വേറെയില്ലെന്ന് അവകാശപ്പെട്ട ബോളിവുഡ് നടി കങ്കണ റണൗട്ടിനെ പരിഹസിച്ച് മുതിർന്ന അഭിഭാഷകൻ പ്രശാന്ത് ഭൂഷൺ. കങ്കണ നായികയായ 'മണികർണിക: ദ് ക്യൂൻ ഓഫ് ഝാൻസി' എന്ന സിനിമയുടെ ചിത്രീകരണ വിഡിയോ ട്വിറ്ററിൽ പങ്കുവച്ചാണ് ഭൂഷണിന്റെ ട്രോൾ. സംഗതി പെട്ടെന്ന് വൈറലായി.

'ഝാൻസ കാ റാണി' (തട്ടിപ്പിന്റെ റാണി) എന്ന കുറിപ്പോടെയാണ് പ്രശാന്ത് ഭൂഷൺ 13 സെക്കൻഡുള്ള വീഡിയോ പങ്കുവച്ചിരിക്കുന്നത്. വെളുത്ത കുതിരപ്പുറത്തിരുന്നു വാളുയർത്തി കങ്കണ ഭടന്മാരോടൊപ്പം കുതിക്കുന്ന രംഗമാണു വീഡിയോയുടെ തുടക്കത്തിൽ. അവസാന ഭാഗത്തെത്തുമ്പോൾ യഥാർത്ഥ കുതിരയെയല്ല കങ്കണ തെളിച്ചതെന്നും അതേ വലുപ്പമുള്ള ഒരിടത്തുറപ്പിച്ച യന്ത്രപ്പാവയിലാണ് ഇരുന്നതെന്നും വ്യക്തമാകുന്നു.

Jhansa ki Rani! pic.twitter.com/64VZ7M94Ce

— Prashant Bhushan (@pbhushan1) February 9, 2021

തന്നേക്കാൾ ബുദ്ധിയും അഭിനയശേഷിയും ഉള്ള നടിമാർ ഈ ഗ്രഹത്തിൽ ഉണ്ടെങ്കിൽ അവരുമായി തുറന്ന സംവാദത്തിന് തയാറാണെന്നും അവരുടെ കഴിവ് തെളിയിക്കാൻ സാധിച്ചാൽ അഹങ്കാരം ഉപേക്ഷിക്കുമെന്നുമായിരുന്നു കങ്കണയുടെ ട്വീറ്റ്. ഈ ലോകത്തിൽ മറ്റൊരു നടിക്കും തന്നേക്കാൾ കഴിവില്ലെന്നും ഏതു വിധത്തിലുള്ള കഥാപാത്രങ്ങളും തനിക്കു വഴങ്ങുമെന്നുമായിരുന്നു സ്വയം പുകഴ്ത്തൽ. 'പല തലങ്ങളുള്ള കഥാപാത്രങ്ങൾ ചെയ്യാൻ മെറിൽ സ്ട്രീപ്പിനോളം കഴിവുണ്ട്. ഗാൽ ഗഡോട്ടിനെപ്പോലെ ആക്ഷനും ഗ്ലാമറും ഒരുമിച്ചു ചെയ്യാനും എനിക്കാകും'– നടി പറഞ്ഞു. കർഷക സമരത്തെ പിന്തുണച്ച പോപ് താരം റിയാനയേയും കങ്കണ കടന്നാക്രമിച്ചിരുന്നു.