വാഷിംഗ്ടൺ: അമേരിക്കൻ പ്രസിഡന്റായി സ്ഥാനമേറ്റെടുത്ത ശേഷം ആദ്യമായി ചൈനീസ് പ്രസിഡന്റുമായി സംഭാഷണത്തിൽ ഏർപ്പെട്ട് ജോ ബൈഡൻ. സ്വതന്ത്രവും തുറന്നതുമായ ഇൻഡോ- പസഫിക്​ മേഖല പ്രധാനമാണെന്ന്​ ബൈഡനും പരസ്​പര സംഘർഷം ദുരന്തമാകുമെന്ന്​ ചൈനീസ് പ്രസിഡന്റ് ഷി ജിൻപിംഗും സംഭാഷണത്തിനിടെ പറഞ്ഞു. തി​രഞ്ഞെടുപ്പ്​ വിജയത്തിൽ ഷി ബൈഡനെ അനുമോദിക്കുകയും ചെയ്തു. ഹോങ്കോംഗ് തായ്​വാൻ വിഷയത്തിൽ ബൈഡൻ നടുക്കം രേഖപ്പെടുത്തി. സംഭാഷണത്തിന്​ മുന്നോടിയായി യു.എസ്​ സ്​റ്റേറ്റ്​ സെക്രട്ടറി ആൻറണി ബ്ലി​ങ്കനും ചൈനീസ്​ നയതന്ത്ര പ്രതിനിധി യാംഗ്​ ജീച്ചിയും തമ്മിൽ ബന്ധപ്പെട്ടിരുന്നു. നേരത്തെ മൈക്​ പെൻസുമായും യാംഗ് സംഭാഷണം നടത്തിയിരുന്നു.കഴിഞ്ഞ വർഷം മാർച്ചിൽ ഡൊണൾഡ്​ ട്രംപും ഷിയും തമ്മിലാണ്​​ അവസാനമായി ഇരുരാജ്യങ്ങൾക്കുമിടയി​ൽ നേതൃതല സംഭാഷണം നടന്നത്​.

 പ്രതീക്ഷയിൽ ചൈന

അതേസമയം, ചൈനയ്ക്കെതിരെ മുൻ പ്രസിഡന്റ് ഡൊണാൾഡ് നടപ്പിലാക്കിയ നയങ്ങൾ തന്നെ ബൈഡനും പിന്തുടരുമെന്നാണ് വിവരം. ട്രംപ് കടുത്ത ചൈന വിരുദ്ധ നിലപാടുകളാണ് സ്വീകരിച്ചിരുന്നത്. പ്രചാരണ കാലയളവിൽ ഷിയെ തെമ്മാടിയെന്ന്​ ബൈഡൻ വിളിച്ചത്​ വാർത്തയായിരുന്നു. ചൈനയെ ഒറ്റപ്പെടുത്താനും ശിക്ഷിക്കാനും രാജ്യാന്തര തലത്തിലെ ശ്രമങ്ങൾക്ക്​ മുന്നിൽ നിൽക്കുമെന്നും ബൈഡൻ അന്ന് പറഞ്ഞിരുന്നു. തിരഞ്ഞെടുപ്പിൽ വിജയിച്ച ശേഷവും ബൈഡൻ ഇത് ആവർത്തിച്ചിരുന്നു. നേരത്തെ, ട്രംപ്​ ഭരണകൂടം നടപ്പാക്കിയ ഇറക്കുമതി നിരോധനം എടുത്തുകളയില്ലെന്നും അധികൃതർ പറയുന്നു.എന്നിരുന്നാലും, ബൈഡന്റെ ഭരണത്തെ പ്രതീക്ഷയോടെയാണ് ചൈന കാണുന്നത്. ബൈഡൻ പ്രായോഗികമായി പ്രവർത്തിക്കുന്നയാളും യാഥാർത്ഥ്യ ബോധമുള്ള വ്യക്തിയുമാണെന്ന് ചൈനീസ്​ വക്​താവ്​ പ്രത്യാശ പങ്കുവച്ചിരുന്നു.ഉയ്ഗൂർ മൂസ്ലിംങ്ങൾക്കെതിരെ നടത്തുന്ന വംശഹത്യയുടെ പേരിൽ ചൈനയ്ക്കെതിരെ അമേരിക്ക അടക്കമുള്ള രാജ്യങ്ങൾ രംഗത്തുണ്ട്. ദക്ഷിണ ചൈന കടലിൽ കൂടുതൽ ശക്​തിപ്പെടുത്തിയ ചൈനീസ് സൈനിക സംവിധാനങ്ങൾക്കെതിരെയും വ്യാപക വിമർശനമുണ്ട്​. ഈ കടലിലെ പല കൊച്ചുദ്വീപുകളും ചൈന പൂർണമായി സൈനികവത്​കരിച്ചുകഴിഞ്ഞെന്നാണ് റിപ്പോർട്ടുകൾ.

.