മോസ്​കോ: റഷ്യൻ നഗരമായ ഷെർഷിൻസ്​കിൽ കൗതുകം പരത്തി നീല തെരുവ്​ നായ്​ക്കൾ. നിഷ്​നി നോവ്​ഗോരോഡ്​ പ്രദേശത്താണ്​ നീല നിറത്തിലുള്ള തെരുവ്​ നായ്​ക്കളെ കണ്ടെത്തിയത്. കോപ്പർ സൾഫേറ്റ്​ അടങ്ങിയ രാസമാലിന്യം മൂലമാണ് നായ്​ക്കൾക്ക് നീല നിറം വന്നതെന്ന് ഡെയ്​ലി മെയിൽ റിപ്പോർട്ട്​ ചെയ്യുന്നു.

ഷെർഷിൻസ്​കിൽ മുൻപ് വലിയൊരു രാസ ഉൽപ്പാദന ഫാക്​ടറി പ്രവർത്തിച്ചിരുന്നു. ആറുവർഷം മുമ്പ്​ പ്ലാന്റ്​ അടച്ചുപൂട്ടി. ഫാക്​ടറിയിൽ ഉണ്ടായിരുന്ന കോപ്പർ മാലിന്യമാകാം നായ്​ക്കളുടെ നീലനിറത്തിന്​ കാരണമെന്ന്​ പ്ലാന്റിന്റെ മാനേജർ ആൻഡ്രി മിസ്​ലിവെറ്റ്​സ്​ പറഞ്ഞു. നായ്​ക്കൾ അതുവഴി അലഞ്ഞുനടക്കുന്നത്​ പതിവാണ്​. ആ സമയത്ത് അവർ കോപ്പർ സൾഫേറ്റ്​ അടങ്ങിയ മാലിന്യത്തിൽ തെരച്ചിൽ നടത്തിയിരിക്കാം. കുറച്ച് വർഷങ്ങൾക്ക്​ മുമ്പും നായ്​ക്കളെ മറ്റു നിറങ്ങളിൽ കണ്ടതായി കേട്ടിരുന്നു. നായ്​ക്കളെ അവിടെ നിയന്ത്രിക്കാൻ ആരുമില്ല -അദ്ദേഹം കൂട്ടിച്ചേർത്തു.

അതേസമയം, ഷെർഷിൻസ്​ക്​ നഗര അധികൃതർ നായ്​ക്കളെ പിടികൂടി മെഡിക്കൽ പരിശോധനക്ക്​ വിധേയമാക്കാൻ ഒരുങ്ങുകയാണ്​. 2017ൽ നവി മുംബയ് തലോജ വ്യവസായ മേഖലയിൽ നായ്​ക്കളെ നീല നിറത്തിൽ ക​ണ്ടെത്തിയിരുന്നു.