വാഷിംഗ്​ടൺ: ഗ്വാണ്ടനാമോ തടവറ അടച്ചുപൂട്ടുമെന്ന വാഗ്ദാനവുമായി ബൈഡൻ ഭരണകൂടം. ഭീകരതയും മനുഷ്യത്വ രഹിതമായ ക്രൂരതയും ഈ തടവറയെ പേരുകേട്ടതാക്കിയത്. ക്യൂബയിലെ ഗ്വാണ്ടനാമോ ദ്വീപിൽ കടുത്ത നിയന്ത്രണങ്ങളോടെ 2002 ൽ അമേരിക്ക സ്ഥാപിച്ച ജയിലാണ് ബൈഡൻ അടച്ചുപൂട്ടുമെന്ന് അറിയിച്ചത്. വരും നാളുകളിൽ ഇതിനായുള്ള ഉത്തരവ് ബൈഡൻ ഒപ്പുവയ്ക്കുമെന്നാണ് റിപ്പോർട്ട്. എന്നാൽ മുൻ പ്രസിഡന്റ് ബറക് ഒബാമയും ഇതേ അറയിപ്പുമായി എത്തിയിരുന്നെങ്കിലും നടപടി മാത്രം ഉണ്ടായില്ലെന്ന ആക്ഷേപം ഉയർന്നിരുന്നു.

ആരംഭ വർഷത്തിൽ ജി.ടി.എം.ഒ എ​ന്നും ഗിറ്റ്​മോ എന്നും വിളിക്കപ്പെടുന്ന തടവറയിൽ അൽഖാഇദ, താലിബാൻ ബന്ധമാരോപിച്ച്​ മാത്രം 680 പേരെയാണ്​ എത്തിച്ചത്. ഇവർ കൊടിയ ക്രൂരതകൾക്ക്​ ഇരയാക്കിയിരുന്നെന്നാണ് വിവരം. വർഷങ്ങൾ നീണ്ട ക്രൂരതകൾക്കൊടുവിൽ തടവുകാരിൽ ഭൂരിപക്ഷവും നാടുവിടുകയോ മരണപ്പെടുകയോ ചെയ്തു. എന്നിട്ടും ഇനിയും 40 പേർ അനിശ്​ചിത കാല തടവിൽ തുടരുകയാണ്. 2001 സെപ്​റ്റംബറിൽ അമേരിക്കയിലെ ലോക വ്യാപാര കേന്ദ്രത്തിനുനേരെ നടന്ന ആക്രമണത്തി​ന്​ പിന്തുണ നൽകിയെന്നും ആസൂത്രണത്തിൽ പങ്കാളികളായെന്നും പറഞ്ഞാണ്​ ഇവരെ തടവിലിട്ടിരിക്കുന്നത്​. ട്രംപ്​ അധികാരത്തിലിരുന്ന അവസാന വർഷങ്ങളിൽ ഗ്വാണ്ടനാമോ തടവുകാരുടെ മോചനവുമായി ബന്ധപ്പെട്ട നടപടികൾ പൂർണമായി നിറുത്തിവെച്ച നിലയിലായിരുന്നു.​