ജനക്ഷേമം ലക്ഷ്യം വയ്ക്കുന്ന പാർട്ടിക്കൊപ്പമായിരിക്കും താൻ നിൽക്കുകയെന്നും എന്തെങ്കിലും പദവിയിൽ താൻ എത്തുകയാണെങ്കിൽ ഒരു രൂപ മാത്രമേ ശമ്പളമായി കൈപ്പറ്റുകയുളൂ എന്നും സംവിധായകനും നടനുമായ മേജർ രവി. അടുത്തിടെ കോൺഗ്രസിന്റെ യാത്രയിൽ താൻ പങ്കെടുക്കുക മാത്രമാണ് ഉണ്ടായതെന്നും പാർട്ടിയിൽ ചേരുന്ന കാര്യം സംബന്ധിച്ച് തീരുമാനമൊന്നും ഉണ്ടായിട്ടില്ലെന്നും അദ്ദേഹം തന്റെ ഫേസ്ബുക്ക് പോസ്റ്റിലൂടെ പറയുന്നു.

അഴിമതി കാട്ടാതെ ജനങ്ങൾക്കായി പ്രവർത്തിക്കുന്ന ഒരു പാർട്ടിക്കായി താൻ കാത്തിരിക്കുകയാണെന്നും അദ്ദേഹം തന്റെ സോഷ്യൽ മീഡിയാ കുറിപ്പിലൂടെ പറയുന്നു. യുഡിഎഫിന്റെ ഐശ്വര്യ കേരള യാത്രയില്‍ പങ്കെടുത്തതിന് പിന്നാലെ സംവിധായകനും നടനുമായ മേജര്‍ രവി കോണ്‍ഗ്രസിലേക്ക് വരുന്നു എന്ന വർത്തകൾക്കിടെയാണ് അദ്ദേഹത്തിന്റെ ഈ പ്രതികരണം.

കുറിപ്പ് ചുവടെ:

'ഗുഡ് ഈവനിംഗ്

ജനങ്ങളെ അഴിമതിരഹിതമായി സേവിക്കുക എന്ന എന്റെ ആവശ്യം നടപ്പിലാക്കുന്ന ഒരു പാർട്ടിക്ക് വേണ്ടി ഞാൻ കാത്തിരിക്കുകയാണ്. ഞാൻ ഇക്കാര്യം അധികം വൈകാതെ നിങ്ങളെയെല്ലാം അറിയിക്കും. കുപ്രചരണങ്ങളിൽ വീഴരുത്. ശരിയാണ്, ഞാൻ കോൺഗ്രസിന്റെ യാത്രയിൽ പങ്കെടുത്തു. എന്റെ നന്മ ആഗ്രഹിക്കുന്ന എല്ലാവരോടും അത്രയും മാത്രമേ ഇപ്പോൾ പറയുന്നുള്ളൂ. ജനക്ഷേമത്തിനു പൂർണമായും പിന്തുണ നൽകുന്ന ഒരു പാർട്ടിയോടൊപ്പമായിരിക്കും ഞാൻ നിൽക്കുക. എന്തെങ്കിലും പദവി എനിക്ക് ലഭിക്കുകയാണെങ്കിൽ, ഒരു രൂപ മാത്രം ശമ്പളമായി കൈപ്പറ്റിയ ശേഷം ബാക്കി പാവപ്പെട്ട പെൺകുട്ടികളുടെ വിദ്യാഭ്യാസത്തിനായി നൽകും. കാത്തിരിക്കൂ...ജയ് ഹിന്ദ്.'