ഹൈദരാബാദ് : വാലന്റൈൻസ് ഡേ ആഘോഷങ്ങൾ രാജ്യത്ത് നരോധിക്കണമെന്ന് ശ്രീരാമസേന നേതാവ് പ്രമോദ് മുത്തലിക്ക് ആവശ്യപ്പെട്ടു ഹിന്ദു സംസ്‌കാരത്തെ നശിപ്പിക്കുന്നതിന് വേണ്ടിയാണ് ഇത്തരം ആഘോഷങ്ങൾ കൊണ്ടാടുന്നത്. യുവജനങ്ങളെ വഴിതെറ്റിക്കുന്ന മോശം പ്രവണതയാണിത്. കേന്ദ്രസംസ്ഥാന സർക്കാരുകൾ വാലന്റൈൻസ് ഡേ ആഘോഷം നരോധിക്കാൻ നടപടിയെടുക്കണമെന്നും മുത്തലിക്ക് പ്രസ്താവനയിൽ ആവശ്യപ്പെട്ടു.
വാലന്റൈൻസ് ഡേ ആഘോഷം, തുറന്ന സെക്സിനെ പ്രോത്സാഹിപ്പിക്കുന്ന പ്രവണതയാണ്. ഇതുവഴി മയക്കുമരുന്ന് ഉപയോഗവും വർധിക്കുന്നു. വാലന്റൈൻസ് ഡേയിൽ ഗുരുവനന്ദനം പ്രോഗ്രാം നടത്തുകയും, അദ്ധ്യാപകരെയും മാതാപിതാക്കളെയും ആദരിക്കുകയുമാണ് വേണ്ടതെന്നും പ്രമോദ് മുത്തലിക്ക് പറഞ്ഞു.. വാലന്റൈൻസ് ഡേ രാജ്യത്തിന്റെ സംസ്‌കാരത്തിനും കുടുംബവ്യവസ്ഥയ്ക്കും എതിരാണെന്നും ആരോപിച്ച് ബജ്റംഗ്ദൾ പ്രവർത്തകർ പ്രകടനം നടത്തി. വാലന്റൈൻസ് ഡേ ആഘോഷം സംസ്ഥാനത്ത് നരോധിക്കണമെന്നും ബജ്റംഗ്ദൾ തെലങ്കാന സർക്കാരിനോട് ആവശ്യപ്പെട്ടു.
ഹൈദരാബാദിൽ സംഘടിച്ചെത്തിയവർ വാലന്റൈൻ ആശംസ കാർഡുകൾ കത്തിച്ച് പ്രതഷേധിച്ചു. ഇന്ത്യൻ സംസ്‌കാരം മൂല്യങ്ങളിൽ ഉറച്ചതാണെന്നും കുടുംബം അതിന്റെ ഭാഗമാണെന്നും ബജ്റംഗ്ദൾ കൺവീനർ സുഭാഷ് ചന്ദർ പറഞ്ഞു. വാലന്റൈൻസ് ഡേ ആഘോഷങ്ങൾക്ക് പകരം അന്നേദിവസം അമർ ജവാൻ ദിനമായി ആചരിക്കണമെന്നും ബജ്റംഗ്ദൾ ആവശ്യപ്പെട്ടു.