കോട്ടയം: പുതിയ രാഷ്ട്രീയ സമവാക്യങ്ങൾ എഴുതിച്ചേർത്ത് മാണി സി കാപ്പൻ എം എൽ എ യു ഡി എഫിന്റെ ഭാഗമായി. പ്രതിപക്ഷ നേതാവ് രമേശ് ചെന്നിത്തല നയിക്കുന്ന ഐശ്വര്യകേരള യാത്രയ്ക്ക് പാലായിൽ നൽകിയ സ്വീകരണയോഗത്തിൽ കാപ്പൻ എത്തുകയായിരുന്നു. നിരവധി അനുയായികളോടൊപ്പം പാലായിൽ നടത്തിയ റോഡ് ഷോയ്ക്ക്ശേഷമാണ് കാപ്പൻ യു ഡി എഫ് വേദിയിലെത്തിയത്. ഹർഷാരവത്തോടെയും ജയ് വിളികളോടെയുമാണ് അദ്ദേഹത്തെ യു ഡി എഫ് പ്രവർത്തകർ വരവേറ്റത്. തുടർന്ന് ഷാൾ അണിയിച്ച് നേതാക്കൾ അദ്ദേഹത്തെ വേദിയിലേക്ക് ആനയിച്ചു. ഉമ്മൻ ചാണ്ടി, പി കെ കുഞ്ഞാലിക്കുട്ടി,പി ജെ ജോസഫ് തുടങ്ങിയ പ്രമുഖനേതാക്കളും വേദിയിലുണ്ടായിരുന്നു. തലയെടുപ്പുള്ള കൊമ്പനാനയെ പോലെയാണ് പാലായിലെ ജനങ്ങളുമായി മാണി സി കാപ്പൻ യു ഡി എഫ് വേദിയിലെത്തിയതെന്ന് പറഞ്ഞ കുഞ്ഞാലിക്കുട്ടി കാപ്പന്റെ വരവ് യു ഡി എഫിന്റെ വിജയത്തിനുള്ള നാന്ദിയാണെന്നും പറഞ്ഞു. കാപ്പനെ തിരുനക്കര കൊച്ചുകൊമ്പൻ എന്നാണ് പി.ജെ ജോസഫ് വിശേഷിപ്പിച്ചത്.

ജോസ് കെ മാണി​യെ നി​ശി​തമായി​ വി​മർശി​ച്ചുകൊണ്ടായി​രുന്നു കാപ്പന്റെ പ്രസംഗം. ജൂനി​യർ മാൻഡ്രേക്ക് എന്നാണ് ജോസ് കെ മാണി​യെ അദ്ദേഹം വി​ശേഷി​പ്പി​ച്ചത്. ജൂനി​യർ മാൻഡ്രേക്ക് ആയ ജോസ് കെ മാണി​യെ എൽ ഡി​ എഫ് സ്നേഹപൂർവം ഏറ്റെടുത്തു. അതോടെ കഷ്ടകാലം തുടങ്ങി​. പി​ണറായി​ വി​ജയൻ ജൂനി​യർ മാൻഡ്രേക്ക് സി​നി​മ കാണണമെന്നും അദ്ദേഹം ഉപദേശിക്കുകയും ചെയ്തു. യു ഡി​ എഫ് വേദിയി​ൽ മുഖ്യമന്ത്രി​ പി​ണറായി​ വി​ജയനും മന്ത്രി​മാർക്കും അദ്ദേഹം നന്ദി​പറയുകയും ചെയ്തു. കഴി​ഞ്ഞതവണ ജയി​പ്പി​ച്ചതി​നാണ് നന്ദി​പറഞ്ഞത്. പതി​നാറുമാസത്തി​നി​ടെ 462 കോടി​യുടെ വി​കസനമാണ് പാലായി​ൽ ഉണ്ടാതെന്ന് പറഞ്ഞ കാപ്പൻ പാലായുടെ വി​കസനത്തി​ന് ജോസ് കെ മാണി​യും വി​ എൻ വാസവനും എതി​രുനി​ൽക്കുകയാണെന്നും ചരി​ത്രത്തി​ലാദ്യമായാണ് പാലായി​ൽ ഒരു എം എൽ എ ഓഫീസ് ഉണ്ടായതെന്നും പറഞ്ഞു.

കാപ്പൻ എൻ സി പിയിൽനിന്ന് രാജിവച്ചിരുന്നു.തന്റെ ഒപ്പമുള്ളവർ സർക്കാരിൽ നിന്ന് കിട്ടിയ ബോർഡ് കോർപ്പറേഷൻ സ്ഥാനങ്ങളും പാർട്ടി സ്ഥാനങ്ങളും രാജിവയ്ക്കുമെന്നും കാപ്പൻ അറിയിച്ചു. എൻ സി പി ദേശീയ നേതൃത്വം എൽ ഡി എഫിനൊപ്പമാണെന്ന് കാപ്പൻ സമ്മതിച്ചു എന്നാൽ ഇപ്പോഴത്തെ സാഹചര്യത്തിൽ മാറാതിരിക്കാൻ കഴിയില്ലെന്ന് പവാറിനെ അറിയിച്ചുവെന്നാണ് കാപ്പൻ പറയുന്നത്. എം എൽ എ സ്ഥാനം താൻ രാജിവയ്ക്കില്ലെന്നും അദ്ദേഹം പറഞ്ഞു. പുതിയ പാർട്ടിയുടെ പ്രഖ്യാപനം നാളെയുണ്ടാവുമെന്നാണ് റിപ്പോർട്ട്