ശ്രീനഗർ: രാജ്യത്തെ നടുക്കിയ പുൽവാമ ആക്രമണത്തിന്റെ രണ്ടാം വാർഷിക ദിനത്തിൽ തിരക്കേറിയ ജമ്മു ബസ് സ്റ്റാന്റിൽ നിന്ന് ഏഴ് കിലോ സ്ഫോടക വസ്തുക്കൾ കണ്ടെടുത്തു. അത്യുഗ്ര സ്ഫോടന ശേഷിയുള്ള ഐ.ഇ.ഡി(ഇംപ്രൊവൈസ്ഡ് എക്സ്പ്ലോസീവ് ഡിവൈസ്), ആറ് പിസ്റ്റലുകൾ തുടങ്ങിയവയാണ് കണ്ടെത്തി നിർവീര്യമാക്കിയത്. പുൽവാമ വാർഷികത്തിൽ ഭീകരർ ആക്രമണത്തിനൊരുങ്ങുന്നതായി നേരത്തെ വിവരം ലഭിച്ചിരുന്നു. ഇതിന്റെ ഭാഗമായി ബസ് സ്റ്റാൻഡിൽ പരിശോധന നടത്തുന്നതിനിടെയാണ് സ്ഫോടക വസ്തുക്കൾ കണ്ടെടുത്തതെന്നാണ് റിപ്പോർട്ട്. സാംബ ജില്ലയിൽ നിന്ന് രണ്ട് ഭീകരരെ പൊലീസ് അറസ്റ്റ് ചെയ്തതിന് പിന്നാലെയാണിത്. സംഭവവുമായി ബന്ധപ്പെട്ട് ചണ്ഡിഗഡിൽ നിന്നുള്ള നഴ്സിംഗ് വിദ്യാർത്ഥി സുഹൈൽ, ഖ്വാസി എന്നിവരെയാണ് കസ്റ്റഡിയിലെടുത്തതായി ജമ്മു ഐ.ജി മുകേഷ് സിംഗ് പറഞ്ഞു.