കൊച്ചി: രാജ്യാന്തര ചലച്ചിത്ര മേളയിൽ പങ്കെടുക്കുന്നവർക്ക് വേണ്ടിയുള്ള കൊവിഡ് ആൻറിജൻ ടെസ്റ്റ് ഇന്ന് മുതൽ ആരംഭിക്കും. മേളയുടെ മുഖ്യ വേദിയായ സരിത തീയറ്ററിൽ സജ്ജീകരിച്ചിട്ടുള്ള നാല് കൗണ്ടറുകളിൽ രാവിലെ 10 മുതൽ വൈകീട്ട് അഞ്ച് വരെയാണ് പരിശോധന നടക്കുക. ഫെബ്രുവരി 15 മുതൽ 17 വരെയാണ് സൗജന്യ കൊവിഡ് പരിശോധന നടത്തുക.പ്രതിനിധികൾക്കുള്ള രോഗ പരിശോധനയുമായി ബന്ധപ്പെട്ട അറിയിപ്പ് അക്കാദമി എസ്എംഎസിലൂടെ നൽകിയിട്ടുണ്ട്.

ഡെലിഗേറ്റുകൾ, ഒഫിഷ്യലുകൾ, വോളന്റിയർമാർ, ചലച്ചിത്ര പ്രവർത്തകർ, ഡ്യൂട്ടി സ്റ്റാഫ് തുടങ്ങിയവർക്കാണ് ആരോഗ്യ വകുപ്പിന്റെ സഹകരണത്തോടെ ചലച്ചിത്ര അക്കാദമി കൊവിഡ് പരിശോധനയ്ക്കുള്ള സൗകര്യം ഒരുക്കിയിരിക്കുന്നത്. ടെസ്റ്റ് സമയത്തും പാസ് വിതരണത്തിലുമുൾപ്പടെ മേളയുടെ നടത്തിപ്പിലുടനീളം കർശന രോഗ പ്രതിരോധ നടപടികളാണ് അക്കാദമി സ്വീകരിച്ചിരിക്കുന്നത്.