കോഴിക്കോട്: ബി ജെ പി പ്രവർത്തകനെ ആക്രമിച്ച കേസിലെ പ്രതിയെ പിടികൂടാൻ പോയ പൊലീസുകാർക്ക് നേരെ ആക്രമണം. കുറ്റ്യാടി നിട്ടൂരിൽ ഇന്നലെ രാത്രി പതിനൊന്ന് മണിയോടെയായിരുന്നു സംഭവം. എസ് ഐ ഉൾപ്പടെയുള്ള നാല് പൊലീസുകാർക്ക് പരിക്കേറ്റു.

എസ് ഐ വിനീഷ്,സിവിൽ പൊലീസ് ഓഫീസർമാരായ രജീഷ്, സബിൻ, ഹോം ഗാർഡ് സണ്ണി കുര്യൻ എന്നിവർക്കാണ് പരിക്കേറ്റത്. ഗുരുതരമായി പരിക്കേറ്റ ഒരു പൊലീസുകാരനെ കോഴിക്കോട് മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.

ബി ജെ പി പ്രവർത്തകനെ ആക്രമിച്ച കേസിലെ പ്രതിയായ ആമ്പാത്ത് അശോകൻ എന്നയാളെ തേടിപ്പോയതാണ് പൊലീസ്. സി പി എം പ്രവർത്തകനായ ഇയാളുടെ നേതൃത്വത്തിൽ തന്നെയാണ് പൊലീസുകാർക്ക് നേരെ ആക്രമണം ഉണ്ടായതെന്നാണ് സൂചന.പൊലീസ് ജീപ്പും അക്രമി സംഘം തകർത്തു.