സെക്രട്ടറിയേറ്റ് നടയിൽ പി എസ് സി ഉദ്യോഗാർത്ഥികൾക്ക് ഐക്യദാർഢ്യം പ്രഖ്യാപിച്ച് കോൺഗ്രസ് എം എൽ എമാരായ ഷാഫി പറമ്പിലും കെ എസ് ശബരീനാഥനും നടത്തുന്ന നിരാഹാര സമരത്തിന് പിന്തുണയുമായി സംവിധായകൻ അരുൺ ഗോപി. സി പി എമ്മിനെ വിമർശിച്ചും യുവ എം എൽ എമാരുടെ സമരത്തെ പിന്തുണച്ചും ഫേസ്‌ബുക്കിലാണ് അരുൺ ഗോപി തന്റെ അഭിപ്രായം വ്യക്തമാക്കിയത്.

പാവപ്പെട്ടവന്റെ അവകാശങ്ങൾ നേടിയെടുക്കാൻ ചോര ചിന്തിയ സമരമുഖങ്ങളിലൂടെ കടന്നുവന്ന് കൊടിയുടെ നിറത്തിൽ പോലും ചുവപ്പണിഞ്ഞ പ്രസ്ഥാനം ഭരണസിരാകേന്ദ്രങ്ങളുടെ നേതൃ സ്ഥാനത്തുളളപ്പോൾ കണ്ണീരുമായി ഒരു സമരമുഖങ്ങളെയും തെരുവിൽ അലയാൻ വിടരുതായിരുന്നുവെന്ന് യുവ സംവിധായകൻ പറയുന്നു. രാപകലില്ലാതെ പഠിച്ചു നേടിയെടുത്ത ഉദ്യോഗാർത്ഥികളുടെ അവകാശത്തെ കാണാതെ പോകരുത്. അക്ഷരാഭ്യാസമുള്ള ഒരാൾക്കും ഈ വേദന കാണാതെ പോകാൻ കഴിയില്ലെന്നും അദ്ദേഹം പറയുന്നു. ഷാഫി പറമ്പിലിനും ശബരീനാഥിനും നന്ദി പറഞ്ഞാണ് അരുൺ ഗോപി ഫേസ്‌ബുക്ക് കുറിപ്പ് അവസാനിപ്പിക്കുന്നത്.

ഫേസ്‌ബുക്ക് പോസ്റ്റിന്റെ പൂർണരൂപം

പാവപ്പെട്ടവന്റെ അവകാശങ്ങൾ നേടിയെടുക്കാൻ ചോര ചിന്തിയ സമരമുഖങ്ങളിലൂടെ കടന്നുവന്ന് കൊടിയുടെ നിറത്തിൽ പോലും ചുവപ്പണിഞ്ഞ പ്രസ്ഥാനം ഭരണസിരാകേന്ദ്രങ്ങളുടെ നേതൃ സ്ഥാനത്തുള്ളപ്പോൾ കണ്ണീരുമായി ഒരു സമരമുഖങ്ങളെയും തെരുവിൽ അലയാൻ വിടരുതായിരുന്നു...!! രാപകലില്ലാതെ പഠിച്ചു നേടിയെടുത്ത അവരുടെ അവകാശത്തെ കാണാതെ പോകരുത്..!! അക്ഷരാഭ്യാസമുള്ള ഒരാൾക്കും ഈ വേദന കാണാതെ പോകാൻ കഴിയില്ല... തെരുവിലെ വേദനയ്ക്ക് ഒപ്പം നില്ക്കുന്ന എല്ലാവർക്കും സ്നേഹം..!! സമരമുഖത്തു നേതൃ സ്ഥാനത്തുളള പ്രിയ സുഹൃത്തുക്കൾ ഷാഫിക്കും ശബരിക്കും നന്ദി.