വാഷിംഗ്ടൺ: യു.എസ് വൈസ് പ്രസിഡന്റ് കമലാ ഹാരിസിന്റെ മരുമകൾ മീന ഹാരിസിന് താക്കീത് നൽകി വൈറ്റ് ഹൗസ്. എഴുത്തുകാരിയും വസ്ത്ര സംരംഭകയുമായ മീന തന്റെ പ്രശസ്തിക്കുവേണ്ടി കമലാഹാരിസിന്റെ വൈസ് പ്രസിഡന്റ് സ്ഥാനം ദുരുപയോഗം ചെയ്യുന്നതായി വൈറ്റ് ഹൗസ് കുറ്റപ്പെടുത്തി. കമലയുടെ പേര് ഉൾപ്പെടുത്തിയ പുസ്തകമോ വസ്ത്രസംരംഭമായ 'ഫിനോമിനൽ' പുറത്തിറത്തിറക്കിയ 'വൈസ് പ്രസിഡന്റ് ആന്റി' എന്ന് പ്രിന്റ് ചെയ്ത സ്വെറ്റ് ഷർട്ടോ അനുവദനീയമല്ലെന്നും വൈറ്റ് ഹൗസ് അറിയിച്ചു. പാലിക്കേണ്ട മര്യാദകളെ കുറിച്ച് ഫെഡറൽ അഭിഭാഷകർ നേരത്തെ തന്നെ അറിയിച്ചിരുന്നെങ്കിലും പുതിയ ഭരണാധികാരികളുടെ സ്ഥാനമേൽക്കൽ ചടങ്ങിൽ പങ്കെടുക്കാൻ സ്വകാര്യ വിമാനത്തിലെത്തുകയും യാത്രയെ കുറിച്ച് മീനാ ഹാരിസ് ഇൻസ്റ്റഗ്രാമിൽ പോസ്റ്റ് ഷെയർ ചെയ്യുകയും ചെയ്തിരുന്നു. ചില കാര്യങ്ങൾ പൂർണമായും ഒഴിവാക്കാനാവില്ലെങ്കിലും കമലാ ഹാരിസിന്റെ അനന്തരവൾ പെരുമാറ്റത്തിൽ മാറ്റം വരുത്തണമെന്നും കുറച്ചു കൂടി ശ്രദ്ധ ചെലുത്തണമെന്നുമാണ് വൈറ്റ് ഹൗസിന്റെ നിർദേശം.

കുട്ടികൾക്ക് വേണ്ടിയുള്ള പുസ്തകങ്ങളുടെ രചയിതാവായ മീനയുടെ ഒരു പുസ്തകത്തിന്റെ പേര് തന്നെ 'കമല ആൻഡ് മായാസ് ബിഗ് ഐഡിയ' എന്നാണ്. കമലയുടെ വൈറ്റ് ഹൗസ് പ്രവേശനത്തിന്റെ തലേ ദിവസം 'അമ്പിഷ്യസ് ഗേൾ' എന്ന പുതിയ പുസ്തകവും പുറത്തിറങ്ങിയിരുന്നു. കറുത്ത വംശജയായ ഒരാൾ പ്രസിഡന്റ് പദവിയിലെത്തുന്ന ദിവസത്തോടനുബന്ധിച്ച് പുറത്തിറങ്ങിയ പുസ്തകവും കമലാ ഹാരിസിന്റെ പ്രശസ്തി ഉപയോഗപ്പെടുത്തിയെന്നാണ് വൈറ്റ് ഹൗസിന്റെ കുറ്റപ്പെടുത്തൽ.