ചെന്നൈ: പെട്രോൾ വില ഓരോദിവസവും റോക്കറ്റുപോലെ കുതിച്ചുയരുകയാണ്. ഇന്നത്തെ വില വർദ്ധനയോടെ 91രൂപയ്ക്ക് മുകളിലാണ് ഒരു ലിറ്ററിന് വില. ഈ പൊള്ളുന്ന വിലയിൽ സൗജന്യമായി പെട്രോൾ കിട്ടിയാലാേ? സംശയിക്കേണ്ട, തീർത്തും സൗജന്യമായി പെട്രോൾ കിട്ടും. തമിഴ്നാട്ടിൽ കരൂർ ജില്ലയിലെ നാഗംപള്ളി ഗ്രാമത്തിലെ വള്ളുവാർ ഏജൻസിയാണ് കുട്ടികൾക്ക് സൗജന്യമായി പെട്രോൾ നൽകുന്നത്. പക്ഷേ, വെറുതേ ചെന്നാൽ ഫ്രീ പെട്രോൾ കിട്ടില്ല. ചെയ്യേണ്ടത് ഇത്രമാത്രം-തമിഴ് സാഹിത്യത്തിലെ ഏറ്റവും പ്രമുഖ കൃതികളിലൊന്നായ തിരുക്കുറളിന്റെ ഈരടികൾ കാണാതെ ചൊല്ലണം. ഒരുതെറ്റുപോലും ഉണ്ടാവരുത്. ഇങ്ങനെ പത്ത് ഈരടികൾ തെറ്റാതെ ചൊല്ലിയാൽ അര ലിറ്റർ പെട്രോളും ഇരുപത് ഈരടികൾ ചൊല്ലിയാൽ ഒരുലിറ്റർ പെട്രോളുമാണ് ലഭിക്കുക. ഒന്നാം ക്ളാസ് മുതൽ 12ാം ക്ളാസുവരെയുളള വിദ്യാർത്ഥികൾക്ക് ഇതിൽ പങ്കെടുക്കാം. ഇതിനകം നിരവധിപേർ അവസരം പ്രയോജനപ്പെടുത്തിക്കഴിഞ്ഞു. ഒരുകുട്ടിക്ക് നിശ്ചിത അവസരം മാത്രമേ പ്രയോജനപ്പെടുത്താനാവൂ.

തിരുക്കുറൾ പഠിക്കുന്നതിനെ പ്രോത്സാഹിപ്പിക്കുക എന്ന ലക്ഷ്യത്തോടെയാണ് സ്പെഷ്യൽ ഓഫർ വച്ചതെന്നാണ് പമ്പിന്റെ നടത്തിപ്പുകാർ പറയുന്നത്. പഠനം പ്രോത്സാഹിപ്പിക്കാൻ വഴിയെന്താണെന്ന് ചിന്തിച്ചിരിക്കുമ്പോഴാണ് സൗജന്യമായി പെട്രോൾ നൽകാം എന്ന ഓഫർ മുന്നോട്ടുവയ്ക്കാൻ ചിലർ നിർദ്ദേശിച്ചതെന്നും അവർ പറയുന്നു.

തിരുവള്ളുവരാണ് തിരുക്കുറൾ രചിച്ചത്. തമിഴ് സാഹിത്യത്തിലെ ഏറ്റവും പ്രമുഖ കൃതികളിലൊന്നാണിത്. തമിഴ് മറൈ (തമിഴ് വേദം), തെയ്‌വ നൂൽ (ദിവ്യഗ്രന്ഥം) എന്നീ പേരുകളിലും ഇത് അറിയപ്പെടുന്നുണ്ട്. തിരുക്കുറളിൽ 133 അദ്ധ്യായങ്ങളിലായി 1330 കുറളുകൾ(ഈരടികൾ) ആണുള്ളത്. ഇതിൽ ഓരോ അദ്ധ്യായത്തിനും തനതായ വിഷയം സൂചിപ്പിക്കുന്ന പേര് നല്കിയിട്ടുണ്ട്. സ്വയം സദാചാരങ്ങളനുഷ്ഠിച്ച്, യഥാശക്തി പരോപകാരം ചെയ്തുകൊണ്ട് മനുഷ്യജന്മം സഫലമാക്കുവാനാണ് തിരുക്കുറൾ അനുശാസിക്കുന്നത്.