മമ്മൂട്ടി നായകനായി എത്തിയ കോമഡി ആക്ഷൻ ചിത്രങ്ങളെ കുറിച്ച് ചോദിച്ചാൽ ഏവരുടേയും ഓർമ്മയിൽ ആദ്യം വരുന്ന ചിത്രങ്ങളിൽ ഒന്നാണ് രാജമാണിക്യം. പോത്ത് കച്ചവടക്കാരനായി തിരുവനന്തപുരം ഭാഷയിൽ മിന്നും പ്രകടനമാണ് മമ്മൂട്ടി കാഴ്ച വച്ചത്. കളർഫുള്ളായ ജുബ്ബകൾ ധരിച്ച് മമ്മൂട്ടി അവതരിപ്പിച്ച ബെല്ലാരി രാജയുടെ കോസ്റ്റ്യൂം ഡിസൈനർ, വസ്ത്രാലങ്കാരത്തിൽ ദേശീയ അവാർഡ് നേടിയ എസ് ബി സതീശനായിരുന്നു. ഈ സിനിമയ്ക്കായുള്ള കഥ കേട്ടപ്പോൾ ബെല്ലാരി രാജയ്ക്കായി സതീശൻ ഒരുക്കിയിരുന്നത് പരുക്കനായ ചാരനിറത്തിലും, കറുത്തതുമായ വേഷങ്ങളായിരുന്നു.

എന്നാൽ പിന്നീട് മമ്മൂട്ടിയുമായുള്ള ചർച്ചയിലാണ് കളർഫുള്ളായ സിൽക്ക് ജുബ്ബയായാൽ എന്തെന്ന് മമ്മൂട്ടി ചോദിച്ചത്. മമ്മൂക്ക ഇങ്ങനെ പറഞ്ഞതോടെ കോസ്റ്റ്യൂമറും അതിന് തയ്യാറായി, അതിന് കാരണമായി സതീശൻ പറയുന്നത് ഏത് വേഷവും നന്നായി ഇണങ്ങുന്നയാളാണ് മമ്മൂട്ടിയെന്നും അതിനാൽ തന്നെ പുതിയ വേഷങ്ങൾ തയ്യാറാക്കാൻ ഒട്ടും ബുദ്ധിമുട്ടുണ്ടായിരുന്നില്ലെന്നുമാണ്. രാജമാണിക്യം വൻ ഹിറ്റായി മാറി. ഇപ്പോഴും മമ്മൂട്ടി പങ്കെടുക്കുന്ന അമ്മയുടെ ഷോകളിൽ ബെല്ലാരി രാജയായി ഈ വേഷത്തിൽ അദ്ദേഹം പ്രത്യക്ഷപ്പെടാറുണ്ടെന്ന് എസ് ബി സതീശൻ ഓർക്കുന്നു.