വാഷിംഗ്ടൺ: ഏഴ് മാസം കൊണ്ട് 30 കോടി മൈൽ താണ്ടി പെഴ്സീവിയറൻസ് പേടകം ചൊവ്വയിൽ വിജയകരമായി ലാൻഡ് ചെയ്തു. ഇന്ത്യൻ സമയം, ഇന്നലെ പുലർച്ചെ 2.28നാണ് ആറ് ചക്രങ്ങളുള്ള റോവർ ചൊവ്വയിലെ വടക്കൻ മേഖലയായ ജെസീറോ ക്രേറ്ററിൽ ഇറങ്ങിയത്. ചൊവ്വയുടെ അന്തരീക്ഷത്തിൽ 12,100 മൈൽ (19,500 കിലോമീറ്റർ) വേഗതയിൽ സഞ്ചരിച്ച റോവറിനെ പാരച്യൂട്ട് ഉപയോഗിച്ച് വേഗത മന്ദഗതിയിലാക്കി ചൊവ്വാ ഉപരിതലത്തിലിറക്കുകയായിരുന്നു. ജെസീറോയിലെ ജീവന്റെ തെളിവുകൾ അന്വേഷിക്കുകയാണ് ദൗത്യത്തിന്റെ പ്രധാനലക്ഷ്യം. ഗ്രഹത്തിന്റെ മുൻകാലങ്ങളിലെ കാലാവസ്ഥയും ഗ്രഹശാസ്ത്രവും മനസിലാക്കുന്നതും പരിഗണനയിലുണ്ട്. 270 കോടി യു.എസ് ഡോളറായിരുന്നു ദൗത്യത്തിന്റെ ചെലവ്.
അന്തരീക്ഷത്തിലേക്കു പ്രവേശിച്ച ശേഷം 1300 ഡിഗ്രി ഉയർന്ന താപനില പേടകത്തിൽ അനുഭവപ്പെട്ടെങ്കിലും താപകവചം അതിനെ ചെറുത്തു. അന്തരീക്ഷമർദ്ദം മാറുന്നതനുസരിച്ച് ത്രസ്റ്ററുകൾ ജ്വലിപ്പിച്ച് പേടകം സ്ഥിരത നിലനിറുത്തി. വേഗഗ മണിക്കൂറിൽ 1600 ആയതോടെ പേടകത്തിന്റെ പാരച്യൂട്ടുകൾ തുറന്ന് ഇറങ്ങേണ്ട സ്ഥലം കൃത്യമായി നിരീക്ഷിച്ചു. ലാൻഡ് ചെയ്യുന്നതിന് 12 സെക്കൻഡ് മുൻപായി ‘സ്കൈ ക്രെയ്ൻ മനൂവർ’ ഘട്ടം ആരംഭിച്ചു. റോവറിനെ വഹിച്ച്, റോക്കറ്റ് എൻജിനുകൾ ഘടിപ്പിച്ച ഒരു ഭാഗം പേടകത്തിൽ നിന്നു വേർപെട്ട് സ്ഥിരത നേടിയ ശേഷം കേബിളുകളുടെ സഹായത്താൽ റോവറിനെ താഴേക്കിറക്കി. പിന്നീട്, കേബിളുകൾ വേർപെട്ടു.
2020 ജൂലായ് 30ന് ഫ്ലോറിഡയിസെ നാസയുടെ യു.എൽ.എ. അറ്റ്ലസ്-541ൽ നിന്നാണ് ദൗത്യം ആരംഭിച്ചത്. ഇൻജെന്യൂയിറ്റി എന്ന ചെറു ഹെലികോപ്റ്ററിനെയും റോവർ വഹിക്കുന്നുണ്ട്. ഭൂമിക്ക് പുറമെയുള്ള ഗ്രഹത്തിലെത്തുന്ന ആദ്യത്തെ ഹെലികോപ്ടറാണിത്. അനുയോജ്യമായ സമയത്ത് ഇതിനെ പറത്തും. ലാൻഡിംഗ് വിജയകരമായി പൂർത്തീകരിച്ച പേടകം ചൊവ്വാ ഉപരിതലത്തിൽ നിന്ന് ഏതാനും ചിത്രങ്ങൾ പകർത്തി ഭൂമിയിലേക്കയച്ചിട്ടുണ്ട്. സോജണർ,ഓപ്പർച്യൂണിറ്റി,സ്പിരിറ്റ്, ക്യൂരിയോസിറ്റി എന്നിവയ്ക്ക് ശേഷം ചൊവ്വയിലെത്തുന്ന അഞ്ചാമത്തെ റോവറാണ് പെഴ്സിവിയറസ്.
റോവർ
നീളം- 3.048 മീറ്റർ
ഉയരം- 2.13
ഭാരം- 1025 കി.ഗ്രാം
രണ്ട് മീറ്റർ ഭുജം ഉപയോഗിച്ച് താഴേക്ക് തുരക്കാനും പാറക്കഷ്ണങ്ങൾ ശേഖരിക്കാനും സാധിക്കും
പ്ലൂട്ടോണിയം ഉപയോഗിച്ചുള്ള പ്രവർത്തനം
ഇൻജെന്യുയിറ്റി
ഭാരം- 1.8 കിലോഗ്രാം
ഉയരം- 19 ഇഞ്ച് (49 മീറ്റർ)
സൗരോർജ്ജം ഉപയോഗിച്ച് പ്രവർത്തിക്കും
വയർലെസ് കമ്യൂണിക്കേഷൻ സിസ്റ്റം
കംപ്യൂട്ടറുകൾ, നാവിഗേഷൻ സെൻസറുകൾ, രണ്ട് ക്യാമറകൾ
2400 ആർ.പി.എമ്മിൽ കറങ്ങുന്ന കൗണ്ടർറൊട്ടേറ്റിംഗ് ബ്ലേഡുകൾ