തിരുവനന്തപുരം: പളളിപ്പുറത്ത് ബേക്കറി ഉടമയ്‌ക്ക് നേരെ ഗുണ്ടാ ആക്രമണം. ഗുണ്ടാസംഘം ആവശ്യപ്പെട്ട പണം നൽകാൻ വിസമ്മതിച്ചതിനെ തുടർന്ന് കടയിൽ കയറി കുത്തിപരിക്കേൽപ്പിക്കുകയായിരുന്നു. കഴിഞ്ഞ ദിവസം വൈകിട്ട് ആറ് മണിയോടെയാണ് സംഭവം. പളളിപ്പുറം സി ആർ പി എഫ് ജംഗ്ഷനിൽ ബേക്കറി കട നടത്തുന്ന സജാദിനെയാണ് ഗുണ്ടകൾ ആക്രമിച്ചത്.

നിരവധി ക്രിമിനൽ കേസുകളിൽ പ്രതിയായ ഷാനവാസും സംഘവും പണം ആവശ്യപ്പെട്ട് സജാദിന്റെ കടയിലെത്തുകയായിരുന്നു. പണം നൽകാൻ വിസമ്മതിച്ചതോടെ ഭീഷണിപ്പെടുത്തിയെങ്കിലും സജാദ് വഴങ്ങിയില്ല. പിന്നാലെയായിരുന്നു ആക്രമണം. കഴുത്തിനും കൈയ്ക്കും സാരമായി പരിക്കേറ്റ സജാദ് സ്വകാര്യ ആശുപത്രിയിൽ ചികിത്സയിലാണ്.

ആക്രമണം തടയാനെത്തിയ ഓട്ടോറിക്ഷ ഡ്രൈവർ അഷ്റഫിനും പരിക്കേറ്റിട്ടുണ്ട്. പൊലീസുകാരെ ആക്രമിച്ചതടക്കം നിരവധി ക്രിമിനൽ കേസുകളിൽ പ്രതിയാണ് ഷാനവാസ്. വധശ്രമത്തിന് കേസെടുത്ത പൊലീസ് പ്രതികൾക്കായി അന്വേഷണം ആരംഭിച്ചിട്ടുണ്ട്.