കുവൈത്ത് സിറ്റി: കുവൈറ്റിലേക്കുളള വിദേശികളുടെ പ്രവേശന വിലക്ക് വീണ്ടും നീട്ടി. കൊവിഡ് സാഹചര്യം വിലയിരുത്തി ആരോഗ്യമന്ത്രാലയത്തിന്റെ നിർദേശാനുസരിച്ചാണ് വ്യോമയാന മന്ത്രാലയത്തിന്റെ നടപടി. ഇനിയൊരു അറിയിപ്പുണ്ടാകുന്നത് വരെ രാജ്യത്ത് വിദേശികൾക്ക് പ്രവേശനാനുമതി നൽകില്ല എന്നാണ് അധികൃതർ അറിയിച്ചിരിക്കുന്നത്. ഇന്ന് മുതൽ വിദേശികൾക്ക് പ്രവേശനം നൽകാനായിരുന്നു അധികൃതരുടെ നേരത്തേയുളള തീരുമാനം. ഇതാണ് റദ്ദാക്കിയത്. വിലക്ക് എന്നുമാറ്റുമെന്ന് അധികൃതർ ഇതുവരെ ഒരു സൂചനയും നൽകിയിട്ടില്ല.

അതേസമയം, സ്വദേശികൾ, അവരുടെ അടുത്ത ബന്ധുക്കൾ, നയതന്ത്ര ഉദ്യോഗസ്ഥർ, അവരുടെ കുടുംബാംഗങ്ങൾ, ഗാർഹിക തൊഴിലാളികൾ, പൊതു-സ്വകാര്യ മെഡിക്കൽ രംഗത്ത് ജോലിചെയ്യുന്നവർ, അവരുടെ കുടുംബം എന്നിവർക്ക് പ്രവേശനം നൽകും. ഇവർ ഏഴ് ദിവസം ഹോട്ടലിലും ഏഴ് ദിവസം വീട്ടിലുമാണ് ക്വാറന്റൈനിൽ കഴിയേണ്ടത്.