സിനിമ രംഗത്ത് സ്ത്രീ സംവിധായകരെ പ്രോത്സാഹിപ്പിക്കുന്നതിന് വേണ്ടി സംസ്ഥാന സർക്കാരിന്റെ ആഭിമുഖ്യത്തിൽ സംസ്ഥാന ചലച്ചിത്ര വികസന കോർപ്പറേഷൻ (കെ.എസ്.എഫ്.ഡി.സി )നിർമ്മിച്ച ആദ്യ ചിത്രം ഡിവോഴ്‌സിന്റെ ആദ്യപ്രദർശനം കലാഭവൻ തിയേറ്ററിൽ വച്ച് നടന്നു. ഐ ജി മിനി സംവിധാനംചെയ്ത ഡിവോഴ്‌സിന്റെ പ്രദർശന ഉദ്ഘാടനം മന്ത്രി എ.കെ. ബാലൻ നിർവഹിച്ചു.വനിതാശാക്തീകരണത്തിന്റെ കാഴ്ചപ്പാടിൽ തുടങ്ങിയ പദ്ധതി മാതൃകാപരമെന്നു കെ എസ് എഫ് ഡി സി ചെയർമാൻ ഷാജി എൻ കരുൺ പറഞ്ഞു. ഒന്നര കോടിയാണ് സിനിമ നിർമ്മിക്കാനായി സർക്കാർ വനിതാ സംവിധായകർക്ക് അനുവദിച്ചത്.ഐ ജി മിനിക്കൊപ്പം തിരഞ്ഞെടുക്കപ്പെട്ട താര രാമാനുജന്റെ നിഷിദ്ധോ എന്ന ചിത്രത്തിന്റെ പോസ്റ്റ് പ്രൊഡക്ഷൻ ജോലികൾ പുരോഗമിക്കുകയാണ്.
ജീവിത പങ്കാളിയിൽ നിന്ന് ഏൽക്കുന്ന പീഡാനുഭവങ്ങൾ സഹിക്കാനാകാതെ ഈ പെണ്ണുങ്ങൾ തങ്ങളുടെ ദുരിതങ്ങൾക്ക് പരിഹാരം കാണാൻ ശ്രമിക്കുന്നതാണ് ഐ ജി മിനിയുടെ ഡിവോഴ്സ് പറയുന്നത്. തങ്ങളുടെ ദുരിതങ്ങൾക്ക് പരിഹാരം കണ്ടെത്താൻ നീതിന്യായ വ്യവസ്ഥിതിയിൽ എത്തുന്നു. നിയമം അതിന്റെ വ്യവസ്ഥാപിതമായ അളവകോലുകൾ വച്ച് ഓരോരുത്തരുടെയും ജീവിതത്തെ പുനർ നിർണ്ണയിക്കുന്നു. കോടതി മുറികളിലെ ചില അസ്വസ്ഥപെടുത്തുന്ന രംഗങ്ങൾ പെൺ ജീവിതങ്ങളുടെ നേർക്കാഴ്ചയാണ്. പലതട്ടിലുള്ള പല ജോലികളിലും ഏർപ്പെടുന്ന സ്ത്രീകളെ ഓരോ വിവാഹ മോചനം എങ്ങനെയാണ് ബാധിക്കുന്നതെന്ന് ചിത്രത്തിൽ പ്രതിപാദിക്കുന്നു.
''ഒരു രാജ്യം രണ്ടായി വിഭജിക്കപ്പെടുന്നു. വേദനാജനകമായ വിഭജനം. അന്നു വരെയുള്ള അവസ്ഥയും വ്യവസ്ഥയും മാറുന്നു. പുതിയ നിയമങ്ങൾ പുതിയ ഭരണ ക്രമങ്ങൾ. പിന്നെയുള്ളത് വ്യക്തികളുടെ പലായനമാണ്. ഇവിടെ അത് , വേദനകളിൽ നിന്നും അതിജീവനത്തിന്റെ ഉയിർത്തെഴന്നേൽപ്പാണ്. ജനനം, കല്യാണം , മരണം പോലെ ഇന്ന് ജീവിതത്തിൽ സ്വാഭാവികമായി കടന്നു വരുന്ന ഘട്ടമാണ് ഡിവോഴ്സ് .വ്യത്യസ്ത ജീവിത രീതിയിലും പ്രായത്തിലും കഴിയുന്ന ആറു സ്ത്രീകളുടെ ജീവിതത്തിൽ ഡിവോഴ്സ് കയറി വരുന്നു. ഇതിനു മുൻപും മലയാള സിനിമയിൽ വിവാഹമോചന കഥകൾ വന്നിട്ടുണ്ടെങ്കിലും സ്ത്രീകളുടെ വികാരങ്ങളെയും മാനസിക സംഘർഷങ്ങളെയും ആഴത്തിൽ സമീപിക്കുകയായിരുന്നു എന്ത് ലക്ഷ്യം . എന്റെ ഈ സിനിമ പൂർണമായി സ്ത്രീകളുടെ കാഴ്ച്ചപ്പാടിലാണ് പറയാൻ ശ്രമിച്ചിരിക്കുന്നത്''സംവിധായിക ഐ ജി മിനി പറഞ്ഞു.
നാഷ്‌നൽ സ്‌കൂൾ ഓഫ് ഡ്രാമയിലെ പഠനത്തിനു ശേഷം ലാൽ ജോസ്, പി. ബാലചന്ദ്രൻ എന്നിവരുടെ അസോസിയേറ്റ് ആയി പ്രവർത്തിച്ചിരുന്ന മിനി ആദ്യമായി സംവിധാനം ചെയ്യുന്ന ചിത്രം കൂടിയാണിത്. സിനിമയ്ക്ക് കാമറ ചലിപ്പിച്ചിരിക്കുന്നത് വിനോദ് ഇല്ലംപള്ളിയാണ്. സൂപ്പർഹിറ്റ് ചിത്രം തണ്ണീർ മത്തൻ ദിനങ്ങൾ, ജയരാജിന്റെ ഹാസ്യം എന്നീ സിനിമകൾക്കു ശേഷം ഇല്ലംപള്ളി ക്യാമറ ചലിപ്പിക്കുന്ന ചിത്രം കൂടിയാണ് ഡിവോഴ്സ്. ഡേവിസ് മാനുവൽ ആണ് എഡിറ്റിംഗ് . ആർട് നിതീഷ്. പ്രൊഡക്ഷൻ കൺട്രോളർ അരോമ മോഹൻ.കെ .പി .എ.സി. ലീല, അഖില,ജി സരേഷ് കുമാർ , ഷിബ് ല ഫറ,സ്മിത അമ്പു, അമലേന്ദു, അശ്വതി, സന്തോഷ് കീഴാറ്റൂർ,ചന്തുനാഥ് തുടങ്ങിയവർ പ്രധാന കഥാപാത്രങ്ങളെ അവതരിപ്പിച്ചു.