മോസ്​കോ: സ്​പുട്​നിക്​, എപിവാക്​ കൊറോണ എന്നിവയ്ക്ക് ശേഷം, മൂന്നാമതൊരു വാക്സിൻ കൂടി തദ്ദേശീയമായി വികസിപ്പിച്ച് റഷ്യ. കൊവിവാക് എന്ന വാക്സിന് റഷ്യ അടിയന്തര അനുമതി നൽകിക്കഴിഞ്ഞു. ചുമക്കോവ്​ സെന്റർ വികസിപ്പിച്ചെടുത്ത കൊവിവാക്കിന് ക്ലിനിക്കൽ പരീക്ഷണം പൂർത്തിയാക്കുന്നതിന് മുമ്പാണ് അനുമതി നൽകിയത്. നേരത്തെ വികസിപ്പിച്ച മറ്റ് വാക്സിനുകളും പരീക്ഷണഘട്ടങ്ങൾ പൂർണമായി പൂർത്തിയാക്കിരുന്നില്ല. നിലവിൽ തദ്ദേശീയമായി വികസിപ്പിച്ച മൂന്ന്​ വാക്​സിനുകളുള്ള ഏകരാജ്യം റഷ്യയാണെന്ന്​ പ്രധാനമന്ത്രി മിഖായേൽ മിഷുസ്റ്റിൻ അവകാശപ്പെട്ടു. മോസ്​കോയിലെ ഗമേലയാ ഇൻസ്റ്റിറ്റ്യട്ട്​ വികസിപ്പിച്ചെടുത്ത സ്​പുട്​നിക് ആയിരുന്നു റഷ്യയുടെ ആദ്യ വാക്​സിൻ. എന്നാൽ, അവസാനഘട്ട പരീക്ഷണങ്ങൾ പൂർത്തിയാകാത്തത് മൂലം റഷ്യ വിവാദത്തിൽപ്പെട്ടിരുന്നു. നിലവിൽ സ്പുട്നികിന്റെ പരീക്ഷണം പൂർത്തിയായിട്ടുണ്ടെന്നാണ് റിപ്പോർട്ടുകൾ. പ്രാരംഭഘട്ട ട്രയലുകളിൽ സ്​പുട്​നിക്​ 91.4 ശതമാനം ഫലപ്രാപ്​തി കാണിച്ചിരുന്നു. ഇന്ത്യയിലടക്കം വാക്സിന്റെ ക്ലിനിക്കൽ പരീക്ഷണം പുരോഗമിക്കുകയാണ്​.

2020 ഡിസംബർ മുതൽ റഷ്യ വൻ തോതിൽ വാക്സിൻ വിതരണം ആരംഭിച്ചിരുന്നു. ഇതുവരെ രണ്ട് ദശലക്ഷം പേർ വാക്സിൻ എടുത്തതായാണ് വിവരം. വെക്ടർ ഇൻസ്റ്റിറ്റ്യൂട്ട്​ വികസിപ്പിച്ചെടുത്ത എപിവാക്​ കൊറോണയുടെ വാക്സിനേഷൻ പ്രക്രിയയും ആരംഭിച്ചിട്ടുണ്ട്.