പുതുച്ചേരി: പുതുച്ചേരിയിൽ രാഷ്ട്രപതി ഭരണം ഏർപ്പെടുത്താൻ തീരുമാനം. മുഖ്യമന്ത്രി നാരായണസാമിയുടെ നേതൃത്വത്തിലുള്ള സർക്കാർ താഴെവീണതിന് പിന്നാലെയാണ് പുതുച്ചേരിയിൽ രാഷ്ട്രപതി ഭരണം ഏർപ്പെടുത്താൻ കേന്ദ്രമന്ത്രിസഭ അനുമതി നൽകിയത്.

പുതിയ സർക്കാർ രൂപീകരിക്കാൻ പ്രതിപക്ഷം താത്പര്യം അറിയിക്കാതിരുന്നതോടെയാണ് പുതുച്ചേരി രാഷ്ട്രപതി ഭരണത്തിലേക്ക് നീങ്ങിയത്. ഏപ്രിൽ-മേയ് മാസത്തിലായി നിയമസഭാ തിരഞ്ഞെടുപ്പ് നടക്കുന്നത് വരെ പുതുച്ചേരിയിൽ രാഷ്ട്രപതി ഭരണം തുടർന്നേക്കും.

കോൺഗ്രസിന്റെ അഞ്ച് എം.എൽ.എമാരടക്കം ഭരണകക്ഷിയിൽ നിന്ന് ആറ് എം.എൽ.എമാർ രാജിവച്ചതോടെയാണ് ഭൂരിപക്ഷം നഷ്ടമായ നാരായണസാമി സർക്കാർ രാജിവച്ചത്.

ഇതോടെ കോൺഗ്രസ്-ഡി.എം.കെ സഖ്യത്തിൽ എം.എൽ.എമാരുടെ എണ്ണം 12 ആയി കുറഞ്ഞിരുന്നു. എൻ.ആർ.കോൺഗ്രസ്-ബി.ജെ.പി. സഖ്യം നയിക്കുന്ന പ്രതിപക്ഷത്ത് 14 അംഗങ്ങളുണ്ട്.