കരിംനഗർ: അരി വേവിക്കാതെതന്നെ ചോറ് റെഡി. ഗ്യാസും സമയവും ലാഭം. തെലങ്കാനയിലെ കരിംനഗറിലെ യുവ കർഷകനാണ് ഈ 'മാജിക് അരി' വിളയിച്ചെടുത്തത്. അസാമിൽ ഇതിനകംതന്നെ വിജയിച്ച 'ബൊക സൗൽ' എന്ന ഇനം നെല്ലിന്റെ അരിയാണിത്. കരിംനഗറുകാരനായ ഗർല ശ്രീകാന്ത് ആണ് തന്റെ വയലിൽ ഈ നെല്ല് കൃഷി ചെയ്ത് വിളവെടുപ്പ് നടത്തിയത്.

അരി കഴുകി 15 മിനിട്ട് ചൂടുവെള്ളത്തിൽ ഇട്ടു വച്ചാൽ ചോറ് തയ്യാറാവും. അസാമിലെ താഴ്ന്ന പ്രദേശങ്ങളിലാണ് കൂടുതലും 'ബൊക സൗൽ" കൃഷി ചെയ്തു വരുന്നത്. വേവിക്കേണ്ട ആവശ്യമില്ലാത്തതിനാൽ ആവശ്യക്കാർ ഏറെയാണ്. ജൈവ വളങ്ങൾ ഉപയോഗിച്ചാണ് കൃഷി ചെയ്യേണ്ടത്. രാസവളങ്ങൾ ഉപയോഗിച്ചാൽ വളരില്ല. ഈ അരിയിൽ 10.73 ശതമാനം ഫൈബറും 6.8 ശതമാനം പ്രോട്ടീനും അടങ്ങിയിട്ടുണ്ട്.