വാഷിംഗ്​ടൺ: മനുഷ്യാവകാശ ലംഘനങ്ങൾ തുടരുന്ന ചൈനയുമായി അമേരിക്ക സഹകരിക്കരുതെന്നാവശ്യപ്പെട്ട്​ മുൻ യു.എൻ അംബാസഡറും ഇന്ത്യൻ വംശജയുമായ നിക്കി ഹാലി ഉൾപ്പെടെയുള്ള റിപ്പബ്ലിക്കൻ അംഗങ്ങൾ രംഗത്ത്​. 2022ൽ ചൈനയിൽ നടക്കുന്ന ​ശീതകാല ഒളിമ്പിക്​സിൽ നിന്ന്​ യു.എസ്​ പിന്മാറണമെന്ന്​ നിക്കി ആവശ്യപ്പെട്ടു. ഒളിമ്പിക്​സിനായി അന്താരാഷ്​ട്ര ഒളിമ്പിക്​ കമ്മിറ്റി ചൈനക്ക്​ പകരം മറ്റൊരു വേദി കണ്ടെത്തണമെന്നും അവർ നിർദ്ദേശിച്ചു. മനുഷ്യാവകാശ ലംഘനങ്ങൾ മറച്ചുവയ്ക്കാനുള്ള വേദിയായാണ്​ ചൈന ഒളിമ്പിക്​സിനെ കാണുന്നത്​. ഇതു​ തിരിച്ചറിയണമെന്നും നിക്കി പറഞ്ഞു. മത്സരത്തിൽനിന്ന്​ യു.എസ്​ പിന്മാറണമെന്നാവശ്യപ്പെട്ട്​ നിക്കി പ്രചാരണവും ആരംഭിച്ചിട്ടുണ്ട്. അതേസമയം, റിപ്പബ്ലിക്കൻ നേതാക്കളുടെ ആവശ്യം കണക്കിലെടുത്ത്​ മത്സരത്തിൽനിന്ന്​ പിന്മാറുന്നത്​ പരിഗണനയിലില്ലെന്ന് വൈറ്റ്​ഹൗസ്​ വ്യക്തമാക്കി.