കോന്നി : ഗവ.മെഡിക്കൽ കോളേജിലെ കിടത്തിച്ചികിത്സയുടെ ഉദ്ഘാടനം 15ന് ആരോഗ്യ മന്ത്റി കെ.കെ.ശൈലജ ഉദ്ഘാടനം ചെയ്യും. അഡ്വ.കെ.യു.ജനീഷ് കുമാർ എം.എൽ.എയുടെ അദ്ധ്യക്ഷതയിൽ ചേർന്ന അവലോകന യോഗത്തിലാണ് തീരുമാനം. ആദ്യ ഘട്ടമായി 100 കിടക്കയാണ് ക്രമീകരിക്കുന്നത്. കിടത്തിച്ചികിത്സ ആരംഭിക്കുന്നതിനായി സ്ഥിരം ഡോക്ടർമാരെ കൂടാതെ താല്കാലിക ഡോക്ടർമാരെയും നിയമിക്കുന്നതിനുള്ള നടപടി പുരോഗമിക്കുകയാണ്. മെഡിക്കൽ കോളേജ് പ്രിൻസിപ്പൽ ഡോ. സി.എസ്.വിക്രമൻ, സൂപ്രണ്ട് ഡോ. സജിത്കുമാർ, അരുവാപ്പുലം ഗ്രാമ പഞ്ചായത്ത് പ്രസിഡന്റ് രേഷ്മ മറിയം റോയി, വൈസ് പ്രസിഡന്റ് മണിയമ്മ രാമചന്ദ്രൻ ,എച്ച്.എൽ.എൽ ചീഫ് പ്രൊജക്ട് മാനേജർ ആർ.രതീഷ് കുമാർ, ഡപ്യൂട്ടി മാനേജർ രോഹിത് ജോസഫ് തോമസ്, നാഗാർജുന കൺസ്ട്രക്ഷൻ കമ്പനി ഡപ്യൂട്ടി ജനറൽ മാനേജർ സന്തോഷ് കുമാർ, ഗ്രാമപഞ്ചായത്തംഗം ശ്രീകുമാർ തുടങ്ങിയവർ യോഗത്തിൽ പങ്കെടുത്തു.

ജീവനക്കാർ എത്തി

നഴ്‌സിംഗ് സൂപ്രണ്ട്, 4 ഹെഡ് നഴ്‌സ്മാർ, 11 സ്​റ്റാഫ് നഴ്‌സുമാർ തുടങ്ങിയ ജീവനക്കാർ ജോലിക്ക് ഹാജരായിട്ടുണ്ട്. ഇതര വിഭാഗം ജീവനക്കാരും ജോലിക്ക് എത്തിയിട്ടുണ്ട്.

ഡെന്റൽ ഒ.പി.യുടെ ഉദ്ഘാടനം നാലിന് നടക്കും.

ഗൈനക്കോളജി ഒ.പി. ആരംഭിക്കുന്നതിനുള്ള ഒരുക്കങ്ങളും നടക്കുന്നുണ്ട്. 8ന് ഗൈനക്കോളജി ഒ.പിയുടെ ഉദ്ഘാടനം നടക്കും.

കിടത്തി ചികിത്സാ ഉദ്ഘാടനത്തോടെ മെഡിക്കൽ കോളേജ് ആശുപത്രി പ്രവർത്തനം സജീവമാകുകയാണ്. എത്രയും വേഗം 300 കിടക്കയുള്ള ആശുപത്രയായി മാ​റ്റാൻ കഴിയും.

കെ.യു. ജനീഷ് കുമാർ എം.എൽ.എ

എക്‌സറേ മെഷീൻ എത്തി

മെഡിക്കൽ കോളേജിൽ സ്ഥാപിക്കാനുള്ള പുതിയ എക്‌സറേ മെഷീൻ എത്തി. ജപ്പാൻ കമ്പനിയായ ഫ്യൂജി ഫിലിം കോർപ്പറേഷൻ നിർമ്മിച്ച അത്യാധുനിക എക്‌സറേ മെഷീനാണ് എത്തിച്ചിരിക്കുന്നത്.
അഡ്വ.കെ.യു.ജനീഷ് കുമാർ എം.എൽ.എയുടെ പ്രാദേശിക വികസന ഫണ്ടിൽ നിന്നും 30 ലക്ഷം രൂപയാണ് ഇതിനായി ചെലവഴിച്ചത്.