കോന്നി: കോന്നി കെ.എസ്.ആർ.ടി.സി ഡിപ്പോ മൂന്ന് മാസത്തിനകം പ്രവർത്തനമാരംഭിക്കും. ഗതാഗത വകുപ്പു മന്ത്രി എ.കെ.ശശീന്ദ്രന്റെ അദ്ധ്യക്ഷതയിൽ തിരുവനന്തപുരത്തു ചേർന്ന യോഗത്തിലാണ് ഇത് സംബന്ധിച്ച് തീരുമാനമായത്. അഡ്വ.കെ.യു.ജനീഷ് കുമാർ എം.എൽ.എയുടെ ഇടപെടലിനെ തുടർന്നാണ് മന്ത്രി ഉന്നതതല യോഗം വിളിച്ചത്.കെ.എസ്.ആർ.ടി.സിക്കായി മാ​റ്റിവച്ച സ്ഥലം പഞ്ചായത്ത് കൈമാറാത്ത സാഹചര്യത്തിൽ സർക്കാർ ഉത്തരവിലൂടെ ഏ​റ്റെടുക്കും. അഡ്വ.കെ.യു.ജനീഷ് കുമാർ എം.എൽ.എ, കെ.എസ്.ആർ.ടി.സി എം.ഡി.ബിജു പ്രഭാകർ, ഓപ്പറേഷൻ വിഭാഗം എക്‌സിക്യൂട്ടീവ് ഡയറക്ടർ എം.​ടി.സുകുമാരൻ തുടങ്ങിയവർ പങ്കെടുത്തു.

യാർഡ് നിർമ്മാണം ഉടൻ തുടങ്ങും

യാഡ് നിർമ്മാണം, വൈദ്യുതീകരണം ഉൾപ്പടെയുള്ള പ്രവർത്തനങ്ങൾ അടിയന്തരമായി പൂർത്തീകരിക്കാനാവശ്യമായ 50 ലക്ഷം രൂപ എം.എൽ.എ ഫണ്ടിൽ നിന്ന് നല്കും. ഡിപ്പോ ആരംഭിക്കുന്നതിനായി കൂടുതൽ ഡ്രൈവർ, കണ്ടക്ടർ തസ്തിക അനുവദിക്കും.11 ഡ്രൈവർ തസ്തികയും 8 കണ്ടക്ടർ തസ്തികയുമാണ് കൂടുതലായി നല്കുക.

ഗവി - കുമളി ബസ് അടുത്താഴ്ച മുതൽ
മുടങ്ങി കിടക്കുന്ന ഗവി - കുമളി ബസ് സർവ്വീസ് അടുത്തയാഴ്ച പുനരാരംഭിക്കും. പത്തനംതിട്ടയിൽ നിന്ന് ഗവി സർവ്വീസ് മുടക്കമില്ലാതെ നടത്തും. കോന്നി ഗവ.മെഡിക്കൽ കോളേജിൽ കിടത്തി ചികിത്സ ആരംഭിക്കുന്നതിന്റെ ഭാഗമായി കൂടുതൽ സർവ്വീസ് ആരംഭിക്കും.