ചെറുകോൽപ്പുഴ: ഒന്നിച്ച് നിന്നാൽ മാത്രമേ കലിയുഗത്തിലെ അധർമ്മത്തെ എതിർത്ത് തോൽപ്പിച്ച് ധർമ്മ സംസ്ഥാപനം നിലനിറുത്താൻ കഴിയുകയുള്ളൂവെന്ന് ഹിന്ദു ഐക്യവേദി പ്രസിഡന്റ് കെ.പി. ശശികല.
അയിരൂർ ചെറുകോൽപ്പുഴ ഹിന്ദുമതപരിഷത്തിൽ അയ്യപ്പ ധർമ്മ സഭയിൽ മുഖ്യ പ്രഭാഷണം നടത്തുകയായിരുന്നു ശശികല. കലിയുഗവരദൻ കലിയുഗത്തിന്റെ തിന്മകൾക്ക് എതിരെ പോരാടാൻ നിയോഗിക്കപ്പെട്ടത് ആണ്. കലിയുഗം എന്നാൽ അധർമമാണ്. ഒന്നിച്ചു നിന്നാൽ മാത്രമേ കലിയുഗത്തിലെ അധർമത്തെ പുറന്തള്ളി വിജയിക്കാൻ പറ്റുകയുള്ളൂ. ശരണ മന്ത്രം പോലും കൂട്ടമായി ആണ് വിളിക്കുന്നത് ഒന്നിക്കാൻ തയ്യാറാവുക എന്നതാണ് മന്ത്രം ആഹ്വാനം ചെയ്യുന്നതെന്നും ശശികല പറഞ്ഞു.
അയ്യപ്പ തത്വം എന്ന വിഷയത്തിൽ അഡ്വ. ശങ്കു ടി. ദാസ് പ്രഭാഷണം നടത്തി. ഹിന്ദുമത മഹാമണ്ഡലം ട്രഷറർ ടി.കെ.സോമനാഥൻ നായർ അദ്ധ്യക്ഷത വഹിച്ചു.
മുഖ്യ തിരുവാഭരണ പേടകവാഹകരായ ഗുരുസ്വാമിമാർ കുളത്തിനാൽ ഗംഗാധരൻ പിള്ള, മരുതവന ശിവൻകുട്ടി, കിഴക്കേ തോട്ടത്തിൽ പ്രതാപചന്ദ്രൻ നായർ എന്നിവരെ ആദരിച്ചു. മതപാഠശാല ബാലഗോകുലം വിജയികൾക്കുള്ള ട്രോഫികളും വിതരണം ചെയ്തു, ഇലന്തൂർ ഹരിദാസ്, ജി. രാജ് കുമാർ എന്നിവർ പ്രസംഗിച്ചു.

ചെറുകോൽപ്പുഴയിൽ ഇന്ന്
രാവിലെ 7 മുതൽ 8 വരെ ശിവസഹസ്രനാമജപം, 8 മുതൽ 10 വരെ ഭാഗവത പാരായണം, 3.30 മുതൽ 6.30 വരെ മാതൃ സഭ. മുഖ്യ പ്രഭാഷണം സ്വാമിനി ജ്ഞാനാഭനിഷ്ഠ ( ശാന്താനന്ദമഠം ഋഷിജ്ഞാന സാധനാലയം, പത്തനംതിട്ട), അദ്ധ്യക്ഷ: മാലേത്ത് സരളാദേവി ( ഹിന്ദു മത മഹാമണ്ഡലം വൈസ് പ്രസിഡന്റ്), പ്രഭാഷണം : അഡ്വ. സുബ്ബലക്ഷ്മി, സ്വാമി അദ്വൈതാനന്ദ.