പത്തനംതിട്ട : ജില്ലയിലെ കോഴഞ്ചേരി, അടൂർ താലൂക്കുകളുടെ സാന്ത്വന സ്പർശം പരാതി പരിഹാര അദാലത്ത് ഇന്ന് നടക്കും. പത്തനംതിട്ട മാക്കാംകുന്ന് സെന്റ് സ്റ്റീഫൻസ് ഓഡിറ്റോറിയത്തിൽ രാവിലെ 10.30ന് അദാലത്ത് തുടങ്ങും. മന്ത്രി എ.സി.മൊയ്തീൻ ഉദ്ഘാടനം നിർവഹിക്കും. മന്ത്രിമാരായ അഡ്വ.കെ.രാജു, കടകംപള്ളി സുരേന്ദ്രൻ, ആന്റോ ആന്റണി എം.പി, എം.എൽ.എമാരായ ചിറ്റയം ഗോപകുമാർ, വീണാ ജോർജ്, ജില്ലാ പഞ്ചായത്ത് പ്രസിഡന്റ് അഡ്വ.ഓമല്ലൂർ ശങ്കരൻ, ജില്ലാ കളക്ടർ ഡോ.നരസിംഹുഗാരി തേജ് ലോഹിത് റെഡി, പത്തനംതിട്ട നഗരസഭ ചെയർമാൻ അഡ്വ.സക്കീർ ഹുസൈൻ, എ.ഡി.എം ഇ. മുഹമ്മദ് സഫീർ, നഗരസഭ കൗൺസിലർ എ.ആർ.അജിത് കുമാർ, അടൂർ ആർ.ഡി.ഒ എസ്. ഹരികുമാർ തുടങ്ങിയവർ പങ്കെടുക്കും. ഉദ്ഘാടന ശേഷം കോഴഞ്ചേരി താലൂക്കിന്റെ അദാലത്ത് നടക്കും.12.30ന് പട്ടയവിതരണ ഉദ്ഘാടനം മുഖ്യമന്ത്രി പിണറായി വിജയൻ ഓൺലൈനായി നിർവഹിക്കും. 2.30ന് അടൂർ താലൂക്കിന്റെ അദാലത്ത് ആരംഭിക്കും. കൊവിഡ് പശ്ചാത്തലത്തിൽ ഉദ്യോഗസ്ഥരും ജനങ്ങളും മാസ്‌ക്, സാനിറ്റൈസർ എന്നിവ നിർബന്ധമായും ഉപയോഗിക്കുകയും ജാഗ്രത പുലർത്തുകയും ചെയ്യണം.അദാലത്തിൽ പങ്കെടുക്കുന്നവർക്ക് മാസ്‌ക്, സാനിറ്റൈസർ എന്നിവ നൽകാൻ സംവിധാനം ഏർപ്പെടുത്തിയിട്ടുണ്ട്. ഭിന്നശേഷിക്കാർക്കായി പ്രത്യേക കൗണ്ടറും ഇരിപ്പിട സംവിധാനങ്ങളും ഒരുക്കിയിട്ടുണ്ട്. അദാലത്ത് നടക്കുന്ന സ്ഥലത്ത് പ്രത്യേക അന്വേഷണ കൗണ്ടറും രജിസ്‌ട്രേഷൻ കൗണ്ടറും ഉണ്ടാകും. അദാലത്തിലേക്ക് ഓൺലൈനായി അപേക്ഷകൾ നൽകിയിട്ടില്ലാത്ത, അദാലത്ത് വേദിയിൽ പുതിയ അപേക്ഷ സമർപ്പിക്കാൻ എത്തുന്നവർ ആറു മാസത്തിനുള്ളിൽ ലഭിച്ച മെഡിക്കൽ സർട്ടിഫിക്കറ്റ്, റേഷൻ കാർഡ്, ആധാർ കാർഡ്, ബാങ്ക് പാസ് ബുക്ക് എന്നിവ നിർബന്ധമായും കൊണ്ടുവരണം. 60 വയസിന് മുകളിൽ പ്രായമുള്ളവർ, കിടപ്പുരോഗികൾ, ഗുരുതര രോഗമുള്ളവർ എന്നിവർ അദാലത്തിൽ പങ്കെടുക്കേണ്ടതില്ല. ഇവരുടെ പ്രതിനിധികൾക്ക് അദാലത്തിൽ പങ്കെടുക്കാം. ഓൺലൈനിലൂടെ പരാതി സമർപ്പിച്ചവരിൽ ഹാജരാകണമെന്ന് നിർദേശം ലഭിച്ചവർക്കും അദാലത്തിൽ പങ്കെടുക്കാം.