കോഴഞ്ചേരി : ജില്ലാ കഥകളി ക്ലബ്ബിന്റെ നേതൃത്വത്തിൽ നടത്തുന്ന 14ാമത് സംസ്ഥാന കഥകളി മേളയ്ക്ക് ഫെബ്രുവരി 17ന് തിരിതെളിയും. 21 ന് സമാപിക്കും. ചെറുകോൽപ്പുഴ പമ്പാ മണൽപുറത്ത് വിദ്യാധിരാജ നഗറിലാണ് മേള അരങ്ങേറുന്നത്. 17ന് വൈകിട്ട് ആറിന് രാജു ഏബ്രഹാം എം.എൽ.എ ഉദ്ഘാടനം ചെയ്യും. ക്ലബ്ബ് പ്രസിഡന്റ് വി.എൻ. ഉണ്ണി അദ്ധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്റ് അഡ്വ. ഓമല്ലൂർ ശങ്കരൻ, ക്ലബ്ബ് രക്ഷാധികാരി പി.എസ്. നായർ, അയിരൂർ പഞ്ചായത്ത് പ്രസിഡന്റ് അനിത കുറുപ്പ്, പ്രസാദ് കൈലാത്ത്, ജി.ജയറാം എന്നിവർ പ്രസംഗിക്കും. തുടർന്ന് 6.30 ന് കല്യാണ സൗഗന്ധികം കഥകളി.
18 ന് വൈകിട്ട് 6.30 ന് കിർമ്മീരവധം കഥകളി. കെ.എൽ.കൃഷ്ണമ്മ ആട്ടവിളക്ക് തെളിക്കും. 19 ന് 6.30 ന് കാലകേയവധം കഥകളി. കെ.ചെല്ലമ്മ ആട്ടവിളക്ക് തെളിക്കും. 20ന് 6.30ന് ബകവധം കഥകളി. പി.പി.രാമചന്ദ്രൻ പിള്ള ആട്ടവിളക്ക് തെളിക്കും. 21ന് വൈകിട്ട് ആറിന് നടക്കുന്ന സമാപന സമ്മേളനം ജില്ലാ പഞ്ചായത്ത് അംഗം സാറാ തോമസ് ഉദ്ഘാടനം ചെയ്യും. 6.30 മുതൽ ദക്ഷയാഗം കഥകളി. കൊവിഡ് മാനദണ്ഡം പൂർണമായും പാലിച്ചാണ് ഇത്തവണ കഥകളിമേള നടക്കുന്നത്. മുൻവർഷങ്ങളിൽ വിദ്യാർത്ഥികൾക്ക് വേണ്ടി പകൽ സമയത്ത് നടത്താറുള്ള കഥകളി ആസ്വാദനക്കളരി ഇത്തവണ ഇല്ലെന്ന് സെക്രട്ടറി വിമൽരാജ് അറിയിച്ചു.