ചെങ്ങന്നൂർ: അഞ്ചു വർഷത്തിനിടെ ജില്ലയിൽ സർക്കാർ നടപ്പാക്കിയ വിവിധ വികസന പ്രവർത്തനങ്ങൾ വിവരിക്കുന്ന ഇൻഫർമേഷൻ പബ്ലിക് റിലേഷൻസ് വകുപ്പിന്റെ നാലാം ദിന ഫോട്ടോ പ്രദർശനം ചെങ്ങന്നൂരിൽ നടത്തി. ചെങ്ങന്നൂർ കെ. എസ്.ആർ.ടി.സി സ്റ്റാൻഡിൽ നടന്ന ഫോട്ടോ പ്രദർശനം ഏറെ ശ്രദ്ധേയമായി. വികസന പ്രൗഢിയിൽ ആലപ്പുഴ' എന്ന ക്യാമ്പയിന്റെ ഭാഗമായാണ് പ്രദർശനം. ജില്ലയിലെ അഞ്ചു പ്രധാന കേന്ദ്രങ്ങളിലാണ് പ്രദർശനം നടക്കുന്നത്. ഇന്ന് ചേർത്തല കെ.എസ്.ആർ.ടി.സി സ്റ്റാൻഡിലാണ് പ്രദർശനം. കൃഷി, വ്യവസായം, തൊഴിൽ, പശ്ചാത്തല വികസനം, ഗതാഗതം തുടങ്ങി വിവിധ മേഖലകളിൽ നടത്തിയ വികസന പദ്ധതികളുമായി ബന്ധപ്പെട്ട നൂറോളം ചിത്രങ്ങളാണ് പ്രദർശിപ്പിക്കുന്നത്. പ്രദർശനത്തോടൊപ്പം സർക്കാരിന്റെ വികസന പ്രവർത്തനങ്ങളെ ആസ്പദമാക്കി തത്സമയ പ്രശ്‌നോത്തരി മത്സരവും നടന്നു. പ്രേശ്‌നോത്തരിയിൽ വിജയികളായവർക്ക് ജില്ലാ ഇൻഫർമേഷൻ ഓഫീസർ എ. അരുൺകുമാർ സമ്മാനങ്ങൾ വിതരണം ചെയ്തു.