കോന്നി: മുറിഞ്ഞകൽ -അതിരുങ്കൽ -പുന്നമൂട് -രാജഗിരി റോഡിന്റെ ടെൻഡർ നടപടികൾ പൂർത്തിയായതായി അഡ്വ. കെ.യു ജനീഷ് കുമാർ എം.എൽ.എ അറിയിച്ചു. റോഡ് നിർമ്മാണം ഉടൻ ആരംഭിക്കും. നബാർഡ് ഫണ്ടിൽ ഉൾപ്പെടുത്തി15 കോടി രൂപ ചെലവഴിച്ചാണ് റോഡ് നവീകരിക്കുന്നത്.
കലഞ്ഞൂർ, അരുവാപ്പുലം പഞ്ചായത്തുകളിലൂടെ കടന്നുപോകുന്ന റോഡാണിത്.
14.53 കിലോമീ​റ്റർ നീളമുള്ള റോഡ് ബി.എം.ആൻഡ് ബി.സി നിലവാരത്തിൽ ടാർ ചെയ്താണ് നിർമാണം നടത്തുന്നത്. ചെറിയ പാലങ്ങൾ പുനർനിർമിക്കുക, സംരക്ഷണഭിത്തി നിർമിക്കുക, ട്രാഫിക് സേ്റ്റഫി വർക്ക് നടത്തുക തുടങ്ങിയവ ഉൾപ്പെട്ടിട്ടുണ്ട്. കാരയ്ക്കാകുഴി, ഇരുതോട് എന്നീ രണ്ട് ചെറിയ പാലങ്ങളാണ് പുനർനിർമിക്കാനുള്ളത്. ഇവ ബ്രിട്ടീഷുകാരുടെ കാലത്ത് നിർമിക്കപ്പെട്ടിട്ടുള്ളവയാണ്. ഈ രണ്ട് പാലങ്ങളും ട്വിൻബോക്‌സ് കൾവർട്ടായി പുതുക്കി നിർമിക്കും.
കലഞ്ഞൂർ പഞ്ചായത്തിന്റെയും, അരുവാപ്പുലം പഞ്ചായത്തിന്റെയും വികസനത്തിൽ വളരെയധികം പ്രധാനപ്പെട്ട റോഡാണിത്. റോഡ് നിർമാണം പൂർത്തിയാകുന്നതോടെ പത്തനാപുരം, കലഞ്ഞൂർ പഞ്ചായത്തുകളിലെ കിഴക്കൻ മേഖലകളിൽ താമസിക്കുന്നവർക്ക് അരുവാപ്പുലം പഞ്ചായത്തിലെ കല്ലേലി വഴി വേഗത്തിൽ കോന്നി ഗവൺമെന്റ് മെഡിക്കൽ കോളേജിൽ എത്താൻ കഴിയും. 22 കോടി രൂപ മുടക്കി നിർമാണം പൂർത്തീകരിച്ചു കൊണ്ടിരിക്കുന്ന ഇളമണ്ണൂർ പാടം റോഡിലേക്കും ഈ റോഡുവഴി എത്തിച്ചേരാൻ കഴിയും.പുനലൂർ- മൂവാ​റ്റുപുഴ റോഡിന്റെ കോന്നി റീച്ചിന്റെ നിർമാണവും ഉടൻ ആരംഭിക്കുന്നതോടെ കലഞ്ഞൂർ പഞ്ചായത്തിലൂടെ കടന്നുപോകുന്ന റോഡുകളെല്ലാം ആധുനിക നിലവാരത്തിലാകും. മലയോര മേഖലകളിലെ എല്ലാ പ്രധാന റോഡുകളും ഉന്നത നിലവാരത്തിലാക്കി മാ​റ്റുന്നതിനുള്ള വിപുലമായ പദ്ധതികളാണ് മണ്ഡലത്തിൽ നടന്നുവരുന്നതെന്നും എം.എൽ.എ പറഞ്ഞു