ചാവക്കാട്: സംസ്ഥാന ആരോഗ്യ വകുപ്പ് ചാവക്കാട് താലൂക്ക് ആശുപത്രിയിൽ നിർമ്മിച്ച പുതിയ കെട്ടിടം മന്ത്രി കെ.കെ. ശൈലജ ടീച്ചർ ഉദ്ഘാടനം ചെയ്യും. 3.6 കോടി രൂപ ചെലവിലാണ് കെട്ടിടം നിർമ്മിച്ചത്. സ്ത്രീകൾക്കും കുട്ടികൾക്കുമായാണ് പ്രധാനമായും പുതിയ ബ്ലോക്ക്. ഫെബ്രുവരി ആറിന് 4.30ന് ഓൺലൈനിലൂടെയാണ് ഉദ്ഘാടനം നിർവഹിക്കുക.

കെ.വി.അബ്ദുൾ ഖാദർ എം.എൽ.എ അദ്ധ്യക്ഷനാകും. ടി.എൻ. പ്രതാപൻ എം.പി മുഖ്യാതിഥിയാകും. പോസ്റ്റ് ഓപറേറ്റീവ് വാർഡ്, പൊതുജനാരോഗ്യ വിഭാഗം, പ്രതിരോധ കുത്തിവയ്പുകൾ, കാത്തിരിപ്പ് കേന്ദ്രം, മുലയൂട്ടൽ കേന്ദ്രം, ഇമ്മ്യൂണൈസേഷൻ റൂം എന്നിവയും ഇതിന്റെ ഭാഗമായുണ്ട്. 2018ൽ 2.46 കോടി രൂപ ചെലവ് ചെയ്താണ് ഈ കെട്ടിടത്തിന്റെ താഴെ നില പൂർത്തീകരിച്ചത്. ചാവക്കാട് താലൂക്ക് ആശുപത്രിയിൽ കഴിഞ്ഞ വർഷം ഡയാലിസീസ് കെട്ടിടം എം.എൽ.എ ഫണ്ട് ഉപയോഗിച്ച് നിർമ്മിച്ചിരുന്നു. യൂണിറ്റ് പ്രവർത്തനം തുടങ്ങുകയും ചെയ്തു.

വാർത്താ സമ്മേളനത്തിൽ കെ.വി. അബ്ദുൾ ഖാദർ എം.എൽ.എ, ചാവക്കാട് നഗരസഭാ ചെയർപേഴ്‌സൺ ഷീജ പ്രശാന്ത്, ചാവക്കാട് താലൂക്ക് ആശുപത്രി സൂപ്രണ്ട് ഡോ. പി.കെ. ശ്രീജ, ഹെൽത്ത് ഇന്‌സ്‌പെക്ടർ സി.വി. അജയ് കുമാർ എന്നിവർ പങ്കെടുത്തു.