പുതുക്കാട്: റോഡ് യാത്രക്കാർക്ക് കൃത്യമായി ദിശ കാണിക്കാനായി പൊതുമരാമത്ത് വിഭാഗം സ്ഥാപിച്ച ദിശാ ബോർഡുകൾ ശുചീകരിക്കുന്ന യജ്ഞത്തിൽ ഏർപ്പെട്ടിരിക്കുകയാണ് കേച്ചേരി വിദ്യ എൻജിനിയറിംഗ് കോളേജ് നാഷണൽ സർവീസ് സ്‌കീം യൂണിറ്റിലെ വിദ്യാർത്ഥികൾ. പൊതുമരാമത്ത് വിഭാഗവുമായി സഹകരിച്ച് ആദ്യഘട്ടത്തിൽ പുതുക്കാട് ടൗൺ, ഇരിങ്ങാലക്കുട ചന്തക്കുന്ന്, കോണത്തുകുന്ന് മേഖലകളിലെ ബോർഡുകൾ സംഘം ശുചീകരിച്ചു. അഖിൽ ജോയ്, സി.ജെ. ഡാർവിൻ, ആൽഫ്രഡ് ജി. കൊടിയൻ, പി.എസ്. അൽകേഷ് കുമാർ എന്നിവരാണ് നേതൃത്വം നൽകിയത്. പൊതുമാരാമത്ത് വിഭാഗവുമായി ചേർന്ന് കൂടുതൽ സ്ഥലങ്ങളിലേക്ക് പദ്ധതി വ്യാപിപ്പിക്കുമെന്ന് കോളേജ് എൻ.എസ്.എസ് പ്രോഗ്രാം ഓഫീസർമാരായ ഡോ. ഇ. സുനീഷ്, പി.എ. സിന്റോ, എം. ചിത്ര എന്നിവർ അറിയിച്ചു.