തൃശൂർ: ഹരിത കേരളമിഷന്റെ ശുചിത്വ പദവി നേടിയ കുന്നംകുളം നഗരസഭയിൽ സമ്പൂർണ ശുചിത്വ പദവി ലക്ഷ്യമിട്ടുള്ള പ്രവർത്തനങ്ങളുടെ ഭാഗമായി 'നല്ല വീട്, നല്ല നഗരം' ശുചിത്വ വിവര ശേഖരണ സർവേ ആരംഭിച്ചു. മന്ത്രി എ.സി. മൊയ്തീന്റെ ക്യാമ്പ് ഓഫീസിൽ നിന്ന് ആദ്യമായി വിവരം ശേഖരിച്ചു. ചലച്ചിത്രതാരവും നഗരസഭയുടെ ശുചിത്വ അംബാസഡറുമായ നടൻ ശ്രീരാമനാണ് മന്ത്രിയിൽ നിന്നും വിവരശേഖരണം നടത്തിയത്. ശുചിത്വ സംവിധാനം നിലിവിൽ എത്രത്തോളം വീടുകളിലും സ്ഥാപനങ്ങളിലും ഏർപ്പെടുത്തിയിട്ടുണ്ടെന്നത് വിശകലനം ചെയ്യാനുള്ള വിവരശേഖരണമാണ് ആരംഭിച്ചത്. നഗരസഭാ ചെയർപേഴ്‌സൺ സീത രവീന്ദ്രൻ, വൈസ് ചെയർപേഴ്‌സൺ സൗമ്യ അനിലൻ, സ്ഥിരം സമിതി അദ്ധ്യക്ഷൻമാരായ പി.എം. സുരേഷ്, ടി. സോമശേഖരൻ, പ്രിയ സജീഷ്, പി.കെ. ഷബീർ, മുൻ ചെയർമാൻ സി.വി. ബേബി, സെക്രട്ടറി ടി.കെ. സുജിത്, ഹെൽത്ത് സൂപ്പർവൈസർ കെ.എസ്. ലക്ഷ്മണൻ, ഹെൽത്ത് ഇൻസ്‌പെക്ടർ എൻ. കമലാക്ഷി, കുടുംബശ്രീ ചെയർ പേഴ്‌സൺമാരായ തങ്കം വിശ്വംഭരൻ, ഷിജി നികേഷ്, ആസൂത്രണ സമിതി ഉപാദ്ധ്യക്ഷൻ വി. മനോജ് കുമാർ തുടങ്ങിയവർ പങ്കെടുത്തു.