ചാവക്കാട്: കടയുടെ മുന്നിലിരുന്ന് മദ്യപിക്കുന്നത് ചോദ്യം ചെയ്ത കട ഉടമയെ തല്ലിക്കൊന്നു. അകലാട് ബദർപള്ളി സൈക്കിൾ ഷോപ്പ് ഉടമ കുന്നമ്പത്ത് കോഞ്ചാടത്ത് മുഹമ്മദാലിയാണ് (65) മരിച്ചത്. സംഭവത്തെ തുടർന്ന് പ്രതി അകലാട് കുന്നമ്പത്ത് കുരിക്കളകത്ത് ഷഫീഖിനെ (30) വടക്കെക്കാട് പൊലീസ് കസ്റ്റഡിയിലെടുത്തു.

ഞായറാഴ്ച രാത്രി എട്ടോടെയായിരുന്നു സംഭവം. ദേശീയപാതയോരത്ത് മുഹമ്മദാലിയുടെ വീടിന്റെ മുൻഭാഗത്താണ് സൈക്കിൾ ഷോപ്പ്. കടയുടെ മുന്നിൽ ഷഫീഖും, തമിഴ്‌നാട് സ്വദേശിയായ മുരുകനും മദ്യപിക്കുന്നതിനെ മുഹമ്മദാലി ചോദ്യം ചെയ്തു. തുടർന്നുള്ള വാക്കുതർക്കമാണ് മർദ്ദനത്തിൽ കലാശിച്ചത്.

ഞായറാഴ്ച ഉച്ചയ്ക്ക് ഷഫീഖും ഏതാനും പേരും ചേർന്ന് ഇവിടെ ഇരുന്ന് മദ്യപിച്ചിരുന്നു. ഇത് ചോദ്യം ചെയ്തതിനെ തുടർന്നും ഷഫീഖും മുഹമ്മദാലിയും തമ്മിൽ വാക്കുതർക്കം ഉണ്ടായിരുന്നു.