പൂവാർ: ശോച്യാവസ്ഥയിലായ തിരുപുറം വില്ലേജ് ഓഫീസ് പുനർനിർമ്മിക്കണമെന്ന ആവശ്യം ശക്തമാകുന്നു. കെട്ടിടം ജീർണാവസ്ഥയിലായിട്ട് വർഷങ്ങളായി. തകർന്ന് വീഴാറായ ഓടുമേഞ്ഞ മേൽക്കൂര, വിണ്ടുകീറിയ ചുവരുകൾ. ജീർണിച്ച ഫർണിച്ചറുകൾ, ചിതലരിക്കുന്ന ഫയലുകൾ, കാട് മൂടിയ പരിസരം, അപകടാവസ്ഥയിലായ വൃക്ഷങ്ങൾ എന്നിവയാണ് ഓഫീസിന്റെ കൈമുതൽ. അരനൂറ്റാാണ്ടിലധികം പഴക്കമുള്ള കെട്ടിടത്തിനുള്ളിൽ ജീവൻ പണയപ്പെടുത്തിയാണ് ജീവനക്കാർ ജോലിനോക്കുന്നത്. മഴക്കാലത്ത് വിവിധ ആവശ്യങ്ങൾക്കായി ഓഫീസിലെത്താൻ ജനങ്ങൾക്കും ഭയമാണ്.
അരനൂറ്റാണ്ട് മുമ്പ് പഴയകട ജംഗ്‌ഷനിലായിരുന്നു വില്ലേജ് ഓഫീസ് പ്രവർത്തിച്ചിരുന്നത്. വാടക കെട്ടിടത്തിലായിരുന്നു തുടക്കം. പഴയകടക്കാരൻ കടകത്ത് വീട്ടിൽ കേശവൻ തമ്പി വില്ലേജ് ഓഫീസറായി എത്തിയതോടെ ചിത്രം മാറി. അദ്ദേഹം നൽകിയ
10 സെന്റ് ഭൂമിയിലാണ് ഇന്ന് കാണുന്ന കെട്ടിടം നിർമ്മിച്ചത്. റോഡ് വീതി കൂട്ടിയതും ചുറ്റുമതിൽ നിർമ്മിക്കുന്നതിന് മുമ്പുള്ള കൈയേറ്റവും വസ്തുവിൽ കുറവ് വരുത്തിയിട്ടുണ്ട്. കാലാകാലങ്ങളിൽ അറ്റകുറ്റപ്പണി നടത്താത്തതാണ് ഓഫീസിന്റെ ഇന്നത്തെ അവസ്ഥയ്ക്ക് കാരണം. അരുമാനൂർ, എട്ടുക്കുറ്റി, നെല്ലിക്കാക്കുഴി, കാക്കത്തോട്ടം, പുത്തൻകട, പഴയകട, ചെക്കടി, ചർച്ച് ജംഗ്ഷൻ, കുറുമനാൽ, അരുമാനൂർക്കട, മനവേലി, പരണിയം, പുറുത്തിവിള, ചാനൽക്കര, പത്തനാവിള, അരുവള്ളൂർ, കാമ്പുകാല തുടങ്ങിയ പ്രദേശങ്ങളിലെ ജനങ്ങളാണ് ഈ ഓഫീസിനെ ആശ്രയിക്കുന്നത്. ഇവരാണ് ഓഫീസിന്റെ ഇന്നത്തെ അവസ്ഥയിൽ വലയുന്നത്. ആവശ്യത്തിന് ജീവനക്കാരില്ലാത്തും ഓഫീസിന്റെ പ്രവർത്തനത്തെ ബാധിക്കുന്നുണ്ട്. അധികൃതരുടെ അലംഭാവം വെടിയണമെന്നും വില്ലേജ് ഓഫീസിന് പുതിയ മന്ദിരം നിർമ്മിക്കാൻ നടപടി സ്വീകരിക്കണമെന്നുമാണ് ജനങ്ങളുടെ ആവശ്യം.
നടപടികൾ പാളുന്നു
പുതിയ വില്ലേജ് ഓഫീസെന്ന ജനങ്ങളുടെ ആവശ്യത്തിന് വർഷങ്ങളുടെ പഴക്കമുണ്ട്. ഈ ആവശ്യവുമായി ഇവർ മുട്ടാത്ത വാതിലുകളില്ല. വിഷയത്തിൽ തിരുപുറം ഗ്രാമ പഞ്ചായത്ത് പ്രമേയവും പാസാക്കി. എന്നാൽ തുടർ നടപടികൾ ഉണ്ടാകാത്തതാണ് തിരിച്ചടിയായത്. സമരങ്ങൾക്കൊടുവിൽ ഓഫീസിന്റെ സ്ഥലപരിമിതി മറികടക്കാൻ സർക്കാർ അഡിഷണൽ റൂം അനുവധിച്ചു. ഇതിനായി 6,15,722 രൂപയാണ് വകയിരുത്തിയത്. ഹിന്ദുസ്ഥാൻ ലൈഫ് കെയർ ലിമിറ്റഡിനായിരുന്നു നിർമ്മാണ ചുമതല. എന്നാൽ നിലവിലുണ്ടായിരുന്ന ബാത്ത് റൂമിന്റെ ഒരു ഭാഗം കെട്ടിയടച്ച് റൂമാക്കി മാറ്റുകമാത്രമാണ് ചെയ്തതെന്നാണ് ജനങ്ങൾ പറയുന്നത്.
ജീവനക്കാർ
ഒരു വില്ലേജ് ഓഫീസർ
രണ്ട് സ്പെഷ്യൽ വില്ലേജ് ഓഫീസർമാർ
രണ്ട് വില്ലേജ് അസിസ്റ്റന്റ്
ഒരു ഡഫേദാർ
"വില്ലേജ് ഓഫീസ് പുതിയ മന്ദിരത്തോടൊപ്പം സബ് രജിസ്ട്രാർ ഓഫീസും ഉൾപ്പെടുന്ന ഓഫീസ് സമുച്ചയം നിർമ്മിക്കുകയാണ് വേണ്ടത്. "
തിരുപുറം സുരേഷ്, ഗ്രാമ പഞ്ചാായത്ത് വൈസ് പ്രസിഡന്റ്