തിരുവനന്തപുരം: എം.എൽ.എമാരായ കെ.എസ്. ശബരീനാഥനും അനൂപ് ജേക്കബും നിയമസഭയുടെ യുവജനക്ഷേമ- യുവജന കാര്യ സമിതിയിൽ നിന്ന് രാജിവച്ചു.

സർക്കാരിന്റെ പിൻവാതിൽ നിയമനങ്ങളിൽ പ്രതിഷേധിച്ചാണ് രാജി. സംസ്ഥാനത്തെ ഉദ്യോഗാർത്ഥികളുമായി സമിതി ഹിയറിംഗുകൾ നടത്തി അവർക്ക് ജോലിലഭ്യത ഉറപ്പാക്കുന്നതിനും നിയമനങ്ങളിലെ കാലതാമസങ്ങൾ ഒഴിവാക്കുന്നതിനുമടക്കം സ്വീകരിക്കേണ്ട നിർദ്ദേശങ്ങൾ ഉൾക്കൊള്ളിച്ച് സമിതി റിപ്പോർട്ടുകൾ സമർപ്പിച്ചിരുന്നു. അവ പാടേ അവഗണിക്കുകയും പിൻവാതിൽ നിയമനങ്ങൾക്കും നിയമവിരുദ്ധമായ ജോലി സ്ഥിരപ്പെടുത്തലുകൾക്കും മന്ത്രിസഭ ചുക്കാൻ പിടിക്കുകയും ചെയ്യുന്ന സാഹചര്യത്തിൽ സമിതിയുടെ പ്രസക്തി നഷ്ടപ്പെട്ടെന്നും ഇരുവരും ചൂണ്ടിക്കാട്ടി.