കാഞ്ഞങ്ങാട്: സംസ്ഥാനത്തെ ആദ്യ ഇക്കോ സെൻസിറ്റീവ് ആസ്‌ട്രോ ടൂറിസം സെന്റർ മഞ്ഞംപൊതിക്കുന്നിൽ ഒരുങ്ങുന്നു. കാഞ്ഞങ്ങാട് നഗരത്തിൽ നിന്നും വിളിപ്പാടകലെയുള്ള മാവുങ്കാലിന് സമീപത്തുള്ള മഞ്ഞംപൊതിക്കുന്നിന്റെ പ്രകൃതി സൗന്ദര്യം നിലനിർത്തി കൊണ്ടായിരിക്കും വിനോദ സഞ്ചാരപദ്ധതി നടപ്പിലാക്കുക. സന്ദർശകർക്ക് അടിസ്ഥാന സൗകര്യം ഒരുക്കുന്നതോടൊപ്പം സംഗീതത്തിന്റെ പശ്ചാത്തലത്തിൽ വർണ്ണാഭമായ ജലധാര, ബേക്കൽ കോട്ട, തൈക്കടപ്പുറം അഴിമുഖം, വിശാലമായ അറബിക്കടൽ എന്നിവയുടെ ദൂരക്കാഴ്ച കുന്നിൻമുകളിൽ നിന്ന് ആസ്വദിക്കാനുള്ള ബൈനോക്കുലർ സംവിധാനങ്ങൾ, വാനനിരീക്ഷണത്തിനുള്ള ടെലിസ്‌കോപ്പ് എന്നിവ സ്ഥാപിക്കും.

ഇരിപ്പിടങ്ങൾ, സെൽഫി പോയിന്റുകൾ, ലഘുഭക്ഷണശാല, പാർക്കിംഗ് സൗകര്യം എന്നിവ പദ്ധതിയുടെ ഭാഗമായി സജ്ജീകരിക്കും. മഞ്ഞംപൊതിക്കുന്ന് ഇക്കോ സെൻസിറ്റീവ് ആസ്‌ട്രോ ടൂറിസം സെന്ററാകുന്നതോടെ മലമുകളിൽ ആധുനിക ടെലിസ്‌കോപ്പ് സ്ഥാപിച്ച് രാത്രികാലങ്ങളിൽ ആകാശക്കാഴ്ചകൾ ആസ്വദിക്കാൻ അവസരം ലഭിക്കും. റിസപ്ക്ഷൻ സോൺ, ഫ്ളവർ സോൺ, പാർക്കിംഗ് സോൺ, ഫെസിലിലിറ്റി സോൺ, ഫൗണ്ടെയ്ൻ ആന്റ് ആസ്‌ട്രോ സോൺ എന്നിവയാണ് പദ്ധതിയിൽ ഉൾപ്പെടുത്തുക.

ആദ്യഘട്ടത്തിൽ റിസപ്ക്ഷൻ ടൂറിസം വകുപ്പ് നൽകുന്ന ഫണ്ടിൽ ബ്ലോക്കും ജലധാരയും പാർക്കിംഗ് ഏരിയയും പുല്ല് നിറഞ്ഞ കുത്തനെയുള്ള ചെരിവുകളും ടെലസ്‌കോപ്പും ബൈനോക്കുലറും മരത്തോപ്പുകളും ഫൗണ്ടെയ്ൻ പ്ലാസയും പദ്ധതിയുടെ ഭാഗമാകും. രണ്ടാം ഘട്ടത്തിൽ കാസർകോട് വികസന പാക്കേജിൽ ഉൾപ്പെടുത്തി പദ്ധതി വിപുലീകരിക്കും. 150 കാറുകൾക്കും 20 ബസുകൾക്കും 500 ടു വീലറുകൾക്കും ഒരേ സമയം പാർക്ക് ചെയ്യാവുന്ന പാർക്കിംഗ് സോണാണ് മഞ്ഞംപൊതിക്കുന്ന് പദ്ധതിയിൽ ഉൾപ്പെടുത്തിയിരിക്കുന്നത്.