തടിച്ചും വളഞ്ഞുപുളഞ്ഞും കാണുന്ന സിരകളെയാണ്‌ വെരിക്കോസ് വെയിൻ അഥവാ സിരാഗ്രന്ഥി എന്നുപറയുന്നത്. സിരാഗ്രന്ഥിയിലെ വീക്കം ശരീരത്തിൽ എവിടെ വേണമെങ്കിലും വരാവുന്നതാണെങ്കിലും സാധാരണയായി കാലുകളിലാണ് ഇവ കണ്ടുവരുന്നത്. പാദവുമായി ചേരുന്ന സന്ധിക്കടുത്തായി ചികിത്സിച്ച് ഭേദമാക്കാൻ ബുദ്ധിമുട്ടുള്ള വ്രണമായും പിന്നീട് ഇവ മാറാറുണ്ട്.

സ്ഥിരമായി നിൽക്കുകയും ഇരിക്കുകയും ചെയ്യുന്നവരിലും അങ്ങനെ ചെയ്യേണ്ട

ജോലിയുള്ളവരിലുമാണ് ത്വക്കിലെ സിരകളിലെ വാൽവുകൾക്ക് കേടു വന്ന് വെരിക്കോസ് വെയിനായി മാറുന്നത്.

പാരമ്പര്യമായും വണ്ണക്കൂടുതൽ ഉള്ളവരിലും സ്ഥിരമായി നിൽക്കുന്നവർക്കും ഗർഭിണികൾക്കും പ്രായക്കൂടുതൽ കൊണ്ടും വെരിക്കോസ് വെയിൻ ഉണ്ടാകുകയോ വർദ്ധിക്കുകയോ ചെയ്യാം.

വളരെ അപകടം പിടിച്ച അസുഖമെന്ന നിലയിൽ വെരിക്കോസ് വെയിനിനെ കാണേണ്ടതില്ലെങ്കിലും അതുണ്ടാക്കുന്ന ബുദ്ധിമുട്ടും വേദനയും ചികിത്സിച്ചാലും മാറാത്ത വ്രണവും അതുകാരണമുള്ള പ്രയാസങ്ങളും ചെറുതല്ല. വ്രണത്തിന് പലപ്പോഴും ദുർഗന്ധവും നല്ല വേദനയും ഉണ്ടാകും.

ഇടയ്ക്കിടെ ഹൃദയത്തിന്റെ ലെവലിൽ കാലുകൾ ഉയർത്തി കിടക്കുക, ശരിയായ വ്യായാമങ്ങൾ ചെയ്ത് പേശികളെ ബലപ്പെടുത്തുക, ശരീരഭാരം നിയന്ത്രിക്കുക, കൂടുതൽ നേരം നിന്നും ഇരുന്നുമുള്ള ജോലി ഒഴിവാക്കുക, ഇലക്കറികളും പഴവർഗ്ഗങ്ങളും ധാരാളം കഴിക്കുക, കാലിലെ മസിലുകൾക്കും സിരകൾക്കും സഹായകമാകും വിധം സോക്സ്, സ്റ്റോക്കിംസ് മുതലായവ ഉപയോഗിക്കാനും ശ്രദ്ധിക്കണം.

ആയുർവേദ ഔഷധങ്ങൾ ഉപയോഗിച്ച് കാലുകളിലെ രക്തസഞ്ചാരം വർദ്ധിപ്പിക്കുന്ന ചികിത്സകൾ ചെയ്യുക, മസാജ് ചെയ്യുക, നാരുകൾ അധികമുള്ളതും ഉപ്പ് കുറഞ്ഞതുമായ ഭക്ഷണം ശീലമാക്കുകയും ഇടുപ്പിന്റെ ഭാഗം ഇറുകുന്ന വിധമുള്ള വസ്ത്രധാരണം ഒഴിവാക്കുകയും വേണം.

ഹൈ ഹീലുള്ള പാദരക്ഷകൾ,​ വറുത്ത ഭക്ഷണം, സംസ്കരിച്ച ധാന്യങ്ങൾ, കൃത്രിമ മധുരം, കോഫി, മദ്യം എന്നിവ ഒഴിവാക്കുക എന്നിവയാണ് വെരിക്കോസ് വെയിൻ തടയാനുള്ള മാർഗ്ഗങ്ങൾ.

വാഴപ്പഴം, പുളിയുള്ള പഴങ്ങൾ, ആപ്പിൾ, മുന്തിരി, ചെറി, ആപ്രിക്കോട്ട്, ബ്ലാക്ക്ബെറി, പൈനാപ്പിൾ, മഞ്ഞൾ, വെളുത്തുള്ളി, നാരങ്ങ എന്നിവ ബുദ്ധിമുട്ടുകളെ കുറയ്ക്കും.

വെരിക്കോസ് വെയിനിന് വളരെ ഫലപ്രദമായ ചികിത്സകൾ ആയുർവേദ സ്ഥാപനങ്ങൾ വഴി ലഭിക്കുന്നു. സർക്കാർ സ്ഥാപനങ്ങളിൽ അവ സൗജന്യവുമാണ്.