മലയിൻകീഴ്: പ്രകൃതിഭംഗിയും കുളിർകാറ്റും സുന്ദരമാക്കുന്ന ശാസ്താംപാറ വിനോദ സഞ്ചാരകേന്ദ്രം സഞ്ചാരികളെ വരവേൽക്കാനൊരുങ്ങി. ഒരു കോടി രൂപ വിനിയോഗിച്ച് ആദ്യഘട്ട നിർമ്മാണ പ്രവർത്തനങ്ങൾ പൂർത്തിയായിരുന്നു. ഗ്രാമീണ ടൂറിസം പദ്ധതിയിൽ ഉൾപ്പെടുത്തിയുള്ള നവീകരണോദ്ഘാടനം അടുത്തിടെ മുഖ്യമന്ത്രി പിണറായി വിജയൻ ഒൺലൈനിലൂടെ നിർവഹിച്ചിരുന്നു. സമുദ്രനിരപ്പിൽ നിന്ന് 1600 മീറ്ററിലേറെ ഉയരത്തിൽ 14 ഏക്കർ വിസ്‌തൃതിയിൽ വ്യാപിച്ച് കിടക്കുന്ന സമതലപാറയാണിത്. തിരുവനന്തപുരത്തുനിന്ന് 14 കിലോമീറ്റർ അകലെയാണ് ശാസ്താംപാറ. വിളപ്പിൽ ഗ്രാമപഞ്ചായത്തിലെ കരിവിലാഞ്ചി വാർഡിലാണ് ഈ വിനോദകേന്ദ്രം. പ്രതിസന്ധികളെ അതിജീവിച്ചാണ് ശാസ്‌താംപാറയിലെ ടുറിസ്റ്റ് കേന്ദ്രം യാഥാർത്ഥ്യമായത്. വിനോദ കേന്ദ്രമാകുന്നതിന് മുമ്പ് ഈ പാറയ്‌ക്ക് മുകളിൽ സ്ഥിതി ചെയ്യുന്ന ശാ‌സ്‌താക്ഷേത്രത്തിൽ പൂജാരിയും വർഷത്തിലൊരിക്കൽ പൊങ്കാലയിടാൻ വിശ്വാസികളും മാത്രമാണെത്തിയിരുന്നത്. ഐ.ബി. സതീഷ് എം.എൽ.എയുടെ ഇടപെടലിനെ തുടർന്നാണ് പദ്ധതി സജീവമായത്. 2009ൽ ഇടതുസർക്കാർ വിനോദകേന്ദ്രത്തിന് 50 ലക്ഷം രൂപ അനുവദിച്ചു. പദ്ധതിയുടെ നിർമ്മാണോദ്ഘാടനം അന്ന് മന്ത്രിയായിരുന്ന കോടിയേരി ബാലകൃഷ്‌ണൻ 2010 ജൂലായ് 13നാണ് നിർവഹിച്ചത്. വിനോദകേന്ദ്രത്തിലെത്താനുള്ള റോഡ് 4.5 കോടി രൂപ വിനിയോഗിച്ച് നവീകരിച്ചിരുന്നു
സജ്ജമാക്കിയത്
മനോഹരമായ പ്രവേശന കവാടം, സുരക്ഷാവേലി, വിവിധതരം ലൈറ്റുകൾ, കുട്ടികളുടെ പാർക്ക്,
ടോയ്‌ലെറ്റ്, കുടിവെള്ള സൗകര്യം, കോഫി ഷോപ്പ്, സുരക്ഷ ജീവനക്കാർക്കുള്ള സൗകര്യം
എത്തിച്ചേരാനുള്ള വഴി
--------------------------------------
തിരുവനന്തപുരത്തുനിന്ന് വരുമ്പോൾ പേയാട് തച്ചോട്ടുകാവ് മൂങ്ങോട് വഴി ശാസ്‌താംപാറയിലെത്താം. നെയ്യാറ്റിൻകരയിൽ നിന്നാണെങ്കിൽ കിള്ളി - അന്തിയൂർക്കോണം - മൂങ്ങോട് വഴിയും കാട്ടാക്കടയിൽ നിന്നാണെങ്കിൽ കട്ടക്കോട് - വിളപ്പിൽശാല വഴിയും എത്താം. കിഴക്കേകോട്ട, തമ്പാനൂർ, കാട്ടാക്കട എന്നിവിടങ്ങളിൽ നിന്നെല്ലാം വിളപ്പിൽശാലയിലേക്ക് ബസ് കിട്ടും. വിളപ്പിൽശാലയിൽ നിന്ന് രണ്ടു കിലോമീറ്ററാണ് ഇവിടേക്കുള്ള ദൂരം. ഇവിടെ നിന്ന് ഓട്ടോ സർവീസ് ലഭ്യമാണ്. വാഹനമുള്ളവർക്ക് പാറയുടെ അടിവാരത്ത് പാർക്കിംഗ് സൗകര്യമുണ്ട്.
കാഴ്ചയുടെ വിരുന്നൊരുക്കി
-------------------------------------
നഗരത്തിലെ പ്രധാന ഭാഗങ്ങളെല്ലാം ഇവിടെ നിന്ന് കാണാൻ കഴിയും. പാറയിൽ നിന്നുള്ള സൂര്യാസ്‌തമയം മനോഹര കാഴ്ചയാണ്. ശംഖുംമുഖം ബീച്ച്, കേരനിരകളാൽ സമ്പന്നമായ വിഴിഞ്ഞം, കോവളം എന്നിവയും കാഴ്ചയുടെ വിരുന്നൊരുക്കും
സമുദ്രനിരപ്പിൽ നിന്നുള്ള ഉയരം - 1600 മീറ്റർ
14 ഏക്കർ വിസ്‌തൃതി