തിരുവനന്തപുരം: ആറ്റുകാൽ ഭഗവതി ക്ഷേത്രം ട്രസ്റ്റ് ഏർപ്പെടുത്തിയ ഈ വർഷത്തെ ആറ്റുകാൽ അംബ പുരസ്‌കാരം പ്രശസ്ത ചലച്ചിത്രതാരം നെടുമുടി വേണുവിന് സമ്മാനിക്കും. 25,000 രൂപയും ഫലകവും അടങ്ങുന്നതാണ് പുരസ്കാരം. ഈ വർഷത്തെ പൊങ്കാല മഹോത്സവം ആരംഭിക്കുന്ന 19ന് വൈകിട്ട് 6.30ന് പുരസ്കാരം നൽകും. കലാപരിപാടികളുടെ ഉദ്ഘാടനവും നെടുമുടി വേണു നിർവ്വഹിക്കും.

അന്ന് രാവിലെ 9.45ന് ദേവിയെ കാപ്പുകെട്ടി കുടിയിരുത്തുന്നതോടെയാണ് ഉത്സവം തുടങ്ങുക.
കൊവിഡ് മാനദണ്ഡങ്ങൾ പാലിച്ചാകും ഇത്തവണ ഉത്സവചടങ്ങുകൾ. ഫെബ്രുവരി 27നാണ് ആറ്റുകാൽ പൊങ്കാല. ഇത്തവണ ക്ഷേത്രത്തിലെ പണ്ടാര അടുപ്പിൽ മാത്രമാകും പൊങ്കാലയുണ്ടാകുക. ഭക്തജനങ്ങൾ അവരവരുടെ വീടുകളിൽ പൊങ്കാല അർപ്പിക്കണമെന്നും പൊങ്കാല നേദിക്കാൻ ക്ഷേത്രത്തിൽ നിന്നും ശാന്തിമാരുണ്ടാകില്ലെന്നും ക്ഷേത്ര ട്രസ്റ്റ് ഭാരവാഹികൾ അറിയിച്ചു.