ബെൻസി പ്രൊഡക്ഷൻസിന്റെ ബാനറിൽ ബെൻസി നാസറും ആര്യാടൻ ഷൗക്കത്തും നിർമ്മിച്ച് സംവിധായകൻ സിദ്ധാർത്ഥ് ശിവ പാർവ്വതി തിരുവോത്തിനെ നായികയാക്കി ഒരുക്കുന്ന 'വർത്തമാനത്തിലെ ആദ്യ ഗാനം മലയാളികളുടെ പ്രിയതാരങ്ങളായ മഞ്ജു വാര്യർ, റിമ കല്ലിങ്കൽ, രമ്യ നമ്പീശൻ, നവ്യ നായർ എന്നിവരുടെ ഫേസ്ബുക്ക് പേജ് വഴി പുറത്തുവിട്ടു. ചിത്രത്തിന്റെ കഥയും തിരക്കഥയും സംഭാഷണവും ആര്യാടൻ ഷൗക്കത്തിന്റേതാണ്. സ്വാതന്ത്ര്യസമര സേനാനി മുഹമ്മദ് അബ്ദുൾ റഹ്മാനെ കുറിച്ച് ഗവേഷണം നടത്താനായി ഡൽഹിയിലെ ഒരു യൂണിവേഴ്സിറ്റിയിലേക്കു യാത്രതിരിച്ച മലബാറിൽ നിന്നുള്ള ഒരു പെൺകുട്ടി നേരിടുന്ന വെല്ലുവിളികളും പ്രതിസന്ധികളുമാണ് വർത്തമാനത്തിന്റെ പ്രമേയം. 'ഫൈസാ സൂഫിയ' എന്ന ഗവേഷക വിദ്യാർത്ഥിനിയുടെ കഥാപാത്രമാണ് പാർവ്വതിയുടേത്. റോഷൻ മാത്യു, സിദ്ദിഖ് എന്നിവരും ചിത്രത്തിലെ ശ്രദ്ധേയ കഥാപാത്രങ്ങളെ അവതരിപ്പിക്കുന്നു.രണ്ടു പാട്ടുകൾ ചിത്രത്തിലുണ്ട്. ക്യാമറ അഴകപ്പൻ. വർത്തമാനം മാർച്ച് 12ന് തിയേറ്ററുകളിലെത്തും. പി.ആർ.ഒ: പി.ആർ.സുമേരൻ.