'സാജൻ ബേക്കറി സിൻസ് 1962' സിനിമ ഹൗസ്‌ഫുള്ളായി പ്രദർശനം തുടരുന്നുവെന്ന സന്തോഷം പങ്കുവച്ച് നടൻ അജു വർഗീസ്. ചിത്രത്തിന് നേരെ പരിഹാസവുമായി എത്തിയ കമന്റിന് അജു നൽകിയ മറുപടിയാണ് സോഷ്യൽ മീഡിയയിൽ ഇപ്പോൾ ചർച്ചയായിരിക്കുന്നത്. തിയേറ്ററിൽ ഹൗസ്‌ഫുൾ എന്ന ബോർഡ് വച്ച ചിത്രമാണ് അജു പങ്കുവച്ചത്. 'ഹൗസ് ഫുൾ ബോർഡ് എവിടുന്നു ഒപ്പിച്ചു..?' എന്നായിരുന്നു കമന്റ്. പിന്നാലെ നർമ്മരസത്തിൽ താരത്തിന്റെ കമന്റും എത്തി. 'കടം പറഞ്ഞു വാങ്ങി' എന്നാണ് അജുവിന്റെ മറുപടി. താരത്തിന് പിന്തുണയുമായി ആരാധകരും രംഗത്തെത്തിയിട്ടുണ്ട്. അരുൺ ചന്ദു സംവിധാനം ചെയ്ത സാജൻ ബേക്കറിയിൽ ഡബിൾ റോളിലാണ് അജു വർഗീസ് എത്തുന്നത്. ലെനയും അജുവും സഹോദരങ്ങളായി അഭിനയിക്കുന്ന സിനിമ ബേക്കറിയെ ചുറ്റിപ്പറ്റിയാണ് മുന്നോട്ടു പോകുന്നത്. പുതുമുഖം രഞ്ജിത മേനോൻ നായികയാകുന്ന ചിത്രത്തിൽ ഗ്രേസ് ആന്റണി, കെ.ബി. ഗണേഷ് കുമാർ, ജാഫർ ഇടുക്കി, രമേശ് പിഷാരടി, ജയൻ ചേർത്തല, സുന്ദർ റാം എന്നീ പ്രമുഖ താരങ്ങൾക്കൊപ്പം ഒട്ടേറേ പുതുമുഖങ്ങളും അഭിനയിക്കുന്നുണ്ട്.