മലയാളത്തിന്റെ സ്വന്തം സൂപ്പർ സ്റ്റാർ മോഹൻലാൽ ആരാധകരുമായി നടത്തിയ ലൈവ് ട്വിറ്റർ ചാറ്റാണ് ഇപ്പോൾ സമൂഹമാദ്ധ്യമങ്ങൾ ഏറ്റെടുത്തിരിക്കുന്നത്. 'ഒറ്റവാക്കിൽ ഇച്ചാക്കയെ നിർവചിക്കാമോ', 'ബറോസ് എന്നു തുടങ്ങും', 'എമ്പുരാൻ ഈ വർഷം ഇറങ്ങുമോ' എന്നു തുടങ്ങി ആരാധകരുടെ ഒട്ടേറെ ചോദ്യങ്ങൾക്കാണ് താരം ഉത്തരം നൽകിയിരിക്കുകയാണ്. മമ്മൂട്ടിയെക്കുറിച്ച് (ഇച്ചാക്ക) ചോദിച്ചപ്പോൾ ഒറ്റവാക്കിൽ, 'കിടു' എന്നായിരുന്നു മോഹൻലാലിന്റെ മറുപടി. ദൃശ്യം 2 സിനിമയുടെ പ്രമോഷനുമായി ബന്ധപ്പെട്ട് 'മോഹൻലാലിനോടു ചോദിക്കാം' എന്ന പരിപാടിയിൽ നിരവധി പേരാണ് പങ്കെടുത്തത്. സംവിധായകൻ എന്ന നിലയിൽ പൃഥ്വിരാജിനെ എങ്ങനെ കാണുന്നു?, ദൃശ്യം 2 തിയറ്ററിലും റിലീസ് ചെയ്യുമോ?, ജഗതിച്ചേട്ടനെക്കുറിച്ച് ഒറ്റ വാക്കിൽ എന്തു പറയുന്നു? തുടങ്ങി മകളുടെ പുതിയ ബുക്കിനെപ്പറ്റി എന്താണ് അഭിപ്രായം എന്നു വരെയുള്ള ചോദ്യങ്ങൾക്ക് താരം മറുപടി പറഞ്ഞു. ഈ സിനിമയിൽ എത്ര കുഴി വെട്ടും ലാലേട്ടാ എന്ന ചോദ്യത്തിന് "അപ്പം തിന്നാൽ പോരേ മോനേ കുഴി എണ്ണണോ" എന്നായിരുന്നു താരരാജാവിന്റെ മറുപടി. ജീവിതത്തിൽ മുന്നോട്ടു നയിക്കുന്ന ഊർജമെന്തെന്ന ചോദ്യത്തിന് സിനിമയെന്നായിരുന്നു ഉത്തരം. പ്രിയപ്പെട്ട കാർട്ടൂൺ ബോബനും മോളിയുമാണെന്നാണ് താരം പറഞ്ഞത്. തന്റെ ജന്മദിനമാണ്, ഒരു ആശംസ പറയുമോ എന്ന് ചോദിച്ച ആരാധകന് ഉമ്മ നൽകിയും താരം ഞെട്ടിച്ചു. മോഹൻലാൽ നായകനായെത്തുന്ന ഏറ്റവും പുതിയ ചിത്രം ദൃശ്യം 2 ഫെബ്രുവരി 19ന് ആമസോൺ പ്രൈമിലൂടെ റിലീസിനെത്തുകയാണ്. ജീത്തു ജോസഫ് സംവിധാനം ചെയ്യുന്ന ചിത്രത്തിൽ മീന, അൻസിബ, എസ്തർ എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്.