തിരുവനന്തപുരം: സ്‌മാർട്ട് സിറ്റി പദ്ധതിയുടെ നിർവഹണത്തിൽ ദേശീയതലത്തിൽ തിരുവനന്തപുരം കോർപ്പറേഷന് 21ാം റാങ്ക്. അതിവേഗം പദ്ധതി നിർവഹണം നടത്തിയതിനെ തുടർന്നാണ് 90ാം റാങ്കിൽ നിന്ന് 21ാം റാങ്കിലേക്ക് സ്ഥാനം മെച്ചപ്പെടുത്തിയത്. പദ്ധതി പുരോഗതി വിലയിരുത്തുന്നതിന് കേന്ദ്രസർക്കാർ തയ്യാറാക്കിയ വെബ്‌പോർട്ടലിൽ അപ്‌ഡേറ്റ് ചെയ്യുന്ന വിവരങ്ങളുടെ അടിസ്ഥാനത്തിലാണ് റാങ്ക് നിർണയം. സ്‌മാർട്ട് സിറ്റിയുടെ ഭാഗമായി 1068.40 കോടി രൂപയുടെ പദ്ധതികൾ ടെൻഡർ ചെയ്‌തതിൽ 1065.04 കോടി രൂപയുടെ പദ്ധതികൾക്ക് വർക്ക് ഓർഡർ നൽകിയിട്ടുണ്ട്. 1135 കോടി രൂപയാണ് പദ്ധതിക്കായി കേന്ദ്ര, സംസ്ഥാന സർക്കാരുകളും കോർപ്പറേഷനും അനുവദിച്ചത്. പദ്ധതിയുടെ ഭാഗമായ പാളയം മാർക്കറ്റ് വികസനം, സ്‌മാർട്ട് റോഡുകൾ, ചാല വെയർ ഹൗസിംഗ്, രാജാജി നഗർ വികസനം തുടങ്ങിയ മെഗാ പദ്ധതികൾ അടുത്തവർഷം പൂർത്തിയാകുമെന്നും അധികൃതർ അറിയിച്ചു.