അരിമ്പൂർ: അരിമ്പൂർ സഹകരണ ബാങ്കിൽ നടന്ന ഗുണ്ടാ ആക്രമണത്തിൽ മാനേജർക്ക് പരിക്കേറ്റു. വ്യാഴാഴ്ച വൈകിട്ട് 5.30 ഓടെ ലോണിന്റെ കാര്യം സംസാരിക്കാനെന്ന പേരിൽ ബൈക്കിലെത്തിയ രണ്ടംഗ സംഘമാണ് ആക്രമണം നടത്തിയത്. അക്രമികൾ ബാങ്കിന്റെ ഗ്ലാസ് അടിച്ചു തകർക്കുകയും വനിതാ ജീവനക്കാരോട് അസഭ്യം പറയുകയും ഭീഷണിപ്പെടുത്തുകയും ചെയ്തു.

ആക്രമണത്തിനിടെ പൊട്ടിയ ഗ്ലാസ് ശരീരത്തിൽ തുളച്ചു കയറിയ ബാങ്ക് മാനേജർ കൂർക്കഞ്ചേരി സ്വദേശി ജിതേന്ദ്രനെ (49) ജില്ലാ സഹകരണ ആശുപത്രിയിൽ പ്രവേശിപ്പിച്ചു. വനിതാ ജീവനക്കാരുടെ നിലവിളി കേട്ട് സമീപത്തെ വൈദ്യുതി ഓഫീസിലെ ജീവനക്കാർ എത്തിയെങ്കിലും അക്രമി സംഘം രക്ഷപ്പെട്ടു. അന്തിക്കാട് പൊലീസ് സ്ഥലത്തെത്തി അന്വേഷണം നടത്തി. അക്രമികളെ ഉടൻ പിടികൂടണമെന്ന് ജില്ലാ സഹകരണ ബാങ്ക് എംപ്ലോയീസ് അസോസിയേഷൻ ആവശ്യപ്പെട്ടു.