ന്യൂഡൽഹി: കേരള കോൺഗ്രസിന്റെ തിരഞ്ഞെടുപ്പ് ചിഹ്നമായ രണ്ടില ജോസ് വിഭാഗത്തിന് അനുവദിച്ചതിനെതിരെ ജോസഫ് വിഭാഗം സുപ്രീംകോടതിയിൽ ഹർജി നൽകി. ഇതിനു പിന്നാലെ, ഇടക്കാല ഉത്തരവ് പുറപ്പെടുവിക്കും മുമ്പ് തങ്ങളുടെ വാദം കൂടി കേൾക്കണമെന്ന് ആവശ്യപ്പെട്ട് ജോസ് കെ. മാണി തടസ ഹർജിയും ഫയൽ ചെയ്തു.

കേന്ദ്ര തിരഞ്ഞെടുപ്പ് കമ്മിഷൻ ഉത്തരവ് ശരിവച്ച ഹൈക്കോടതിയുടെ വിധി റദ്ദാക്കണമെന്നാണ് ജോസഫ് വിഭാഗം നേതാവ് പി.സി. കുര്യാക്കോസ് സമർപ്പിച്ച ഹർജിയിലെ പ്രധാന ആവശ്യം. ഇടക്കാല ആവശ്യം എന്ന നിലയിൽ വിധി സ്റ്റേ ചെയ്യണമെന്നും ഹർജിയിൽ പറയുന്നുണ്ട്.

കേരള കോൺഗ്രസ് -എം എന്ന പേരും രണ്ടില ചിഹ്നവും ജോസ് വിഭാഗത്തിന് അനുവദിച്ചുള്ള കേന്ദ്ര തിരഞ്ഞെടുപ്പു കമ്മിഷൻ ഉത്തരവ് കഴിഞ്ഞ നവംബർ 20നാണ് ഹൈക്കോടതി ശരിവച്ചത്. ഇതിനെ എതിർത്തുള്ള ജോസഫിന്റെ ഹർജി, കമ്മിഷന്റെ അധികാരത്തിലും അവകാശത്തിലും ഇടപെടില്ലെന്ന് വ്യക്തമാക്കി തള്ളുകയും ചെയ്തു.