ന്യൂഡൽഹി: വിമാനത്തിനുള്ളിൽ മാസ്ക്​ ശരിയായി ധരിക്കാത്തതിനെ തുടർന്ന്​ നാല്​ യാത്രക്കാർക്ക് വിലക്ക് ഏർപ്പെടുത്തി അലൈൻസ്​ എയർ. കഴിഞ്ഞ 16ന് ​ 91- 614 ജമ്മു - ഡൽഹി വിമാനത്തിലെ നാല് യാത്രക്കാർ മാസ്​ക്​ കൃത്യമായി ധരിക്കാൻ വിസമ്മതിക്കുകയായിരുന്നു. പൈലറ്റും കാബിൻ ക്രൂ അംഗങ്ങളും അനൗൺസ്‌മെന്റിലൂടെയും വ്യക്തിപരമായും നിരന്തരമായി ആവശ്യപ്പെട്ടിട്ടും ഇവർ ചെവികൊണ്ടില്ല. തുടർന്നാണ്​ അലൈൻസ്​ എയർ ഇവർക്കെതിരെ നടപടിയെടുത്തത്​.

ഡൽഹിയിൽ വിമാനം ലാൻഡ്​ ചെയ്​തയുടൻ നാല്​ യാത്രക്കാരെയും സുരക്ഷാ ജീവനക്കാർക്ക്​ കൈമാറി. മൂന്ന്​ മാസത്തേക്ക്​ വിലക്ക്​ ഏർപ്പെടുത്തണമെന്നാണ്​ നിർദ്ദേശം. ഡൽഹി ഹൈക്കോടതിയുടെ നിർദ്ദേശപ്രകാരം, മാസ്ക് ധരിക്കാത്തതടക്കം കൊവിഡ് മാനദണ്ഡങ്ങൾ പാലിക്കാത്തവർക്ക് വിമാനയാത്ര വിലക്കണമെന്ന് വ്യോമയാനമന്ത്രാലയം കഴിഞ്ഞ ദിവസം ഉത്തരവിറക്കിയിരുന്നു.