ന്യൂഡൽഹി: കൊവിഡ് വ്യാപനം കണക്കിലെടുത്ത് 10, 12 ക്ലാസുകളിലെ ബോർഡ് പരീക്ഷയ്ക്കായി രജിസ്റ്റർ ചെയ്തിട്ടുള്ള വിദ്യാർത്ഥികൾക്ക് പരീക്ഷാകേന്ദ്രം മാറ്റാൻ അവസരമൊരുക്കി സി.ബി.എസ്.ഇ. ഏത് സ്കൂളിലാണോ പരീക്ഷയെഴുതാൻ രജിസ്റ്റർ ചെയ്തിട്ടുള്ളത് അവിടെ പരീക്ഷാകേന്ദ്രം മാറ്റുന്നത് സംബന്ധിച്ച അപേക്ഷ 25 നകം സമർപ്പിക്കണം. പരീക്ഷാകേന്ദ്രം മാറ്റാനാഗ്രഹിക്കുന്ന സ്കൂളിലും അപേക്ഷിക്കണം.

ഈ അപേക്ഷകളുടെ അടിസ്ഥാനത്തിൽ ഈ മാസം 31 ന് പുതുക്കിയ പരീക്ഷാ കേന്ദ്രങ്ങൾ സി.ബി.എസ്.ഇ വെബ്സൈറ്റ് പ്രസിദ്ധീകരിക്കും. പ്രാക്ടിക്കൽ, തിയറി പരീക്ഷകൾക്ക് വേവ്വേറെ കേന്ദ്രങ്ങൾ അനുവദിക്കില്ല. പ്രാക്ടിക്കൽ പരീക്ഷകൾ മൂന്ന് ഷിഫ്റ്റുകളായി നടത്താനുള്ള നിർദേശവും സി.ബി.എസ്.ഇ നൽകിയിട്ടുണ്ട്.മേയ് ആറിന് തുടങ്ങുന്ന 10ാം ക്ലാസ് പരീക്ഷ ജൂൺ 2നും മേയ് നാലിന് തുടങ്ങുന്ന 12ാം ക്ലാസ് പരീക്ഷ ജൂൺ 14നും അവസാനിക്കും.കൂടുതൽ വിവരങ്ങൾക്ക് cbse.gov.in. വെബ്‌സൈറ്റ് സന്ദർശിക്കുക.