ന്യൂഡൽഹി: മഹാരാഷ്ട്ര ആഭ്യന്തര മന്ത്രി അനിൽ ദേശ്മുഖിനെതിരെ സി.ബി.ഐ അന്വേഷണം ആവശ്യപ്പെട്ടുള്ള ഹർജിയിൽ മുൻ മുംബയ് പൊലീസ് കമ്മിഷണർ പരം ബീർ സിംഗിനോട് ഹൈക്കോടതിയെ സമീപിക്കാൻ നിർദ്ദേശിച്ച് സുപ്രീംകോടതി.
കേസിൽ അനിൽ ദേശ്‌മുഖിനെ കക്ഷി ചേർക്കാത്തതെന്തെന്നും എന്തു കൊണ്ട് ഹൈക്കോടതിയെ സമീപിച്ചില്ലെന്നും ജസ്റ്റിസ് കൗൾ ഉൾപ്പെട്ട ബെഞ്ച് ആരാഞ്ഞു. ഹർജിയിൽ ഉന്നയിച്ചിരിക്കുന്ന ആരോപണങ്ങൾ ഗൗരവമുള്ളതാണ്. എന്നാൽ, ഹർജി ഹൈകോടതിക്ക് മുമ്പാകെയാണ് സമർപ്പിക്കേണ്ടത്. ഇതിന് മുമ്പും ഇത്തരം കേസുകൾ പ്രോത്സാഹിപ്പിച്ചിട്ടില്ലെന്നും കോടതി വ്യക്തമാക്കി.
ഇന്ന് തന്നെ ഹർജി പരിഗണിക്കാൻ ഹൈക്കോടതിയോട് നിർദ്ദേശിച്ച സുപ്രീംകോടതി, കേസിൽ നിഷ്പക്ഷമായ അന്വേഷണത്തിന് ഉത്തരവിടാൻ ഹൈക്കോടതിക്ക് അവകാശമുണ്ടെന്നും നിരീക്ഷിച്ചു.